ନୂଆଦିଲ୍ଲୀ: ନିକଟରେ ଏକ ଭୟଙ୍କର କ୍ରିପ୍ଟୋକରେନ୍ସି ହ୍ୟାକର ସମ୍ମୁଖୀନ ହୋଇଛି ମାଇକ୍ରୋ ବ୍ଲଗିଂ ପ୍ଲାଟଫର୍ମ ଟ୍ବିଟର । ଏଥିରେ ବିଟ୍ କଏନର ପ୍ରୟୋଗରେ ଲକ୍ଷାଧିକ ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି । ଏଥିସହ ଅନେକ ବଡ ବଡ ଓ ପ୍ରଭାବଶାଳୀ ବ୍ୟକ୍ତିଙ୍କ ଆକାଉଣ୍ଟ ଏଥିରେ ହ୍ୟାକ ହୋଇଥିବା ଦେଖାୟାଇଥିଲା । ତେବେ ଏହି କ୍ରିପ୍ଟୋ ହ୍ୟାକର ପ୍ରଭାବ ଭାରତୀୟଙ୍କ ଉପରେ କ’ଣ ରହିଛି ଜାଣିବା ପାଇଁ ଟ୍ବିଟରକୁ ଏକ ନୋଟିସ ଜାରି କରିଛନ୍ତି ଭାରତ ସରକାର ।
କେନ୍ଦ୍ର ସରକାରଙ୍କ ସାଇବର ସିକ୍ୟୁରିଟି ଏଜେନ୍ସି (ସିଇଆରଟି-ଇନ) ଏନେଇ ଟ୍ବିଟରକୁ ନୋଟିସ ଜାରି କରିଛି । ଏହି ଏଜେନ୍ସିର କାର୍ଯ୍ୟ ହେଉଛି ସାମୂହିକ ବା ବଡ ଧରଣର ହ୍ୟାକିଂର ଭାରତୀୟ ୟୁଜର୍ସଙ୍କ ଉପରେ ପ୍ରଭାବ ଯାଞ୍ଚ କରିବା । ତେବେ ଏହି ଘଟଣାରେ ଭାରତୀୟ ୟୁଜର୍ସଙ୍କ ଉପରେ ହ୍ୟାକିଂର ପ୍ରଭାବ ଓ ଏହାର ସମାଧାନ ପାଇଁ ଟ୍ବିଟର କ’ଣ ସବୁ ପଦକ୍ଷେପ ନେଉଛି ସେନେଇ ପ୍ରଶ୍ନ କରିଛି ସିଇଆରଟି । ଏହାପୂର୍ବରୁ ଶନିବାର ସକାଳେ ‘ସୋସିଆଲ ଇଞ୍ଜିନିୟରିଂ ଆଟାକ’ ନାମକ ଏହି ହ୍ୟାକିଂ ଆକ୍ରମଣ ସମ୍ବନ୍ଧରେ ଟ୍ବିଟର ଏକ ସବିଶେଷ ତଥ୍ୟ ପୋଷ୍ଟ କରିଥିଲା ।
ଏହି ତଥ୍ୟରେ ଟ୍ବିଟର ପ୍ରକାଶ କରିଛି କି ହ୍ୟାକିଂ ଦ୍ବାରା ପ୍ରଭାବିତ ହୋଇଥିବା 45 ଆକାଉଣ୍ଟରେ ହ୍ୟାକର ଏହାର ପାସୱାର୍ଡ ରିସେଟ କରିବା, ଲଗଇନ କରିବା ଓ ଆକାଉଣ୍ଟରୁ ଟ୍ବିଟ କରିବାରେ ସକ୍ଷମ ହୋଇଥିଲା । କେବଳ ସେତିକି ନୁହେଁ ପ୍ରଭାବିତ 8ଟି ଆକାଉଣ୍ଟରେ ‘Your Twitter Data’ ଟୁଲର ବ୍ୟବହାର କରି ହ୍ୟାକର ଆକାଉଣ୍ଟର ଡିଟେଲ୍ସ ଡାଉନଲୋଡ କରିଥିବା ଦେଖାଯାଇଛି । ଏହି ଟୁଲ ଦ୍ବାରା ୟୁଜର୍ସଙ୍କର ଆକାଉଣ୍ଟର ଡିଟେଲ୍ସ ହାସଲ କରିହୁଏ ।
ସେପଟେ ଏହି ହ୍ୟାକିଂରେ ପ୍ରଭାବିତ ହୋଇଥିବା 130ଟି ଆକାଉଣ୍ଟର ୟୁଜର୍ସ କେଉଁ କେଉଁ ଦେଶର ତାହା ଏପର୍ଯ୍ୟନ୍ତ ଟ୍ବିଟର ସ୍ପଷ୍ଟ କରିନାହିଁ । ଏଥିସହ ସମ୍ପୃକ୍ତ ଘଟଣାରେ ଫରେନସିକ୍ ଯାଞ୍ଚ ଜାରି ରହିଥିବା ଟ୍ବିଟର ସୂଚନା ଦେଇଛି ।
@IANS
