ଚଣ୍ଡିଗଡ: ଲକଡାଉନ ପାଇଁ ସାରା ଦେଶ ଅସ୍ତବ୍ୟସ୍ତ ହୋଇପଡିଥିବା ବେଳେ କୋରୋନା ଚାଦର ତଳେ ମାଡି ଚାଲିଛି ଅତ୍ୟାଚାର । ଶୁକ୍ରବାର ସନ୍ଧ୍ୟାରେ ଗଣଦୁଷ୍କର୍ମର ଶିକାର ହୋଇଛି ଜଣେ 14 ବର୍ଷୀୟା ନାବାଳିକା । ଘଟଣାଟି ହେଉଛି ହରିୟାଣାର ଜିନ୍ଦ ଜିଲ୍ଲାରେ ।
ଘଟଣା ଅନୁଯାୟୀ ନାବାଳିକା ଜଣକ ଘରେ ଥିବା ସମୟରେ ଜଣେ 16 ବର୍ଷୀୟ ପୁରୁଷ ବନ୍ଧୁ ତାଙ୍କୁ ଘରୁ ବାହାରକୁ ଡାକିଥିଲେ । ଏହି ସମୟରେ କିଛି କଥାରେ ବୁଲାଇ ସେ ନାବାଳିକା ଜଣଙ୍କୁ ନିକଟସ୍ଥ ଏକ ସ୍କୁଲ ଘରକୁ ନେଇଯାଇଥିଲା । ଯେଉଁଠାରେ ପୂର୍ବରୁ ରହିଥିବା ଦୁଇ ବନ୍ଧୁଙ୍କ ସହ ମିଶି ସେ ନାବାଳିକାଙ୍କୁ ଗଣଦୁଷ୍କର୍ମ କରିଥିଲେ । ତେବେ ଏନେଇ କାହାକୁ କିଛି ନକହିବାକୁ ମଧ୍ୟ ଅଭିଯୁକ୍ତମାନେ ନାବାଳିକାଙ୍କୁ ଧମକ ଦେଇଥିଲେ ।
ହେଲେ ଘରକୁ ଫେରି ପରିବାର ଲୋକଙ୍କ ସବୁକିଛି କହିବା ପରେ ପରିବାର ଲୋକେ ଜିନ୍ଦ ଥାନାରେ ଏତଲା ଦେଇଥିଲେ । ଖବର ପାଇଁ ପୋଲିସ ମୁଖ୍ୟ ଅଭିଯୁକ୍ତକୁ ଗିରଫ କରି ପୋକ୍ସୋ ଆକ୍ଟ ଅନୁଯାୟୀ ମାମଲା ଦାୟର କରିଛି । ଏଥିସହ ଘଟଣାର ତଦନ୍ତ ଜାରି ରହିଛି ।
