ପାଟନା: ପପୁ ଯାଦବଙ୍କ ନିର୍ବାଚନୀ ରାଲିରେ ଭାଙ୍ଗିଲା ଷ୍ଟେଜ । ଜନ ଅଧିକାରୀ ପାର୍ଟି ରାଷ୍ଟ୍ରୀୟ ଅଧ୍ୟକ୍ଷ ପପ୍ପୁ ଯାଦବଙ୍କ ଡାହାଣ ହାତ ଭାଙ୍ଗି ଯାଇଛି । ତାଙ୍କୁ ତୁରନ୍ତ ନିକଟସ୍ଥ ହସ୍ପିଟାଲରେ ଭର୍ତ୍ତି କରାଯାଇଛି ।
ବିହାର ନିର୍ବାଚନରେ ଦ୍ବିତୀୟ ପର୍ଯ୍ୟାୟ ନିର୍ବାଚନ ପାଇଁ ଜୋରଦାର ପ୍ରଚାର ଚାଲିଛି । ଭୋଟ ହାତେଇବା ପାଇଁ ପ୍ରଚାର କାର୍ଯ୍ୟ ଚାଲିଥିବା ବେଳେ ଷ୍ଟାର କ୍ୟାମ୍ପନର ତଥା ଦଳୀୟ ନେତା ମାନେ ମଧ୍ୟ ନିର୍ବାଚନ ପ୍ରଚାରରେ ଲାଗିଛନ୍ତି । ଏହି ଅବସରରେ ମୁଜାଫରପୁର ଅଞ୍ଚଳର ମୀନାପୁର ବିଧାନସଭା ନିର୍ବାଚନୀ ସଭାରେ ଜନ ଅଧିକାରୀ ପାର୍ଟି ରାଷ୍ଟ୍ରୀୟ ଅଧ୍ୟକ୍ଷ ପପ୍ପୁ ଯାଦବ ଭାଷଣ ଦେବା ବେଳେ ଅଚାନକ ଭାଙ୍ଗିଯାଇଛି ଷ୍ଟେଜ । ଯାହା ଫଳରେ ତାଙ୍କ ଡାହାଣ ହାତ ଭାଙ୍ଗି ଯାଇଛି | ତାଙ୍କୁ ତୁରନ୍ତ ନିକଟସ୍ଥ ହସପିଟାଲରେ ଭର୍ତ୍ତି କରାଯାଇଛି ।
ଏହି ଅଘଟଣ ପରେ ସେ କହିଛନ୍ତି ‘ମୁଁ ଖୁବ ଶୀଘ୍ର ଜନସାଧାରଣଙ୍କ ନିକଟକୁ ଫେରିବି । ଲୋକଙ୍କ ପ୍ରେମ ଏବଂ ଆଶୀର୍ବାଦ ଯୋଗୁଁ ମୁଁ ଅଧିକ ଆଘାତ ପାଇ ନାହିଁ। ଲୋକଙ୍କ ଆଶୀର୍ବାଦ ମୋ ପାଖରେ ଅଛି। ମୁଁ ଶୀଘ୍ର ଭଲ ହୋଇଯିବି’ ବୋଲି କହିଛନ୍ତି | ମଞ୍ଚରେ ସମର୍ଥକଙ୍କ ଭିଡ ଯୋଗୁଁ ତାହା ଭାଙ୍ଗିଯାଇଥିବା ଜଣାପଡିଛି | ଏହି ଘଟଣା ପରେ ନିର୍ବାଚନ ସଭାରେ ଲୋକଙ୍କ ମଧ୍ୟରେ ବିଶୃଙ୍ଖଳା ହୋଇଥିଲା।
ସୂଚନାଥାଉକି ବିହାର ନିର୍ବାଚନ ପ୍ରଚାର ସମୟରେ ନୀତିଶ କୁମାରଙ୍କ ରାଲିରେ ଚପଲ ଫିଙ୍ଗାଯାଇଥିଲା । କେନ୍ଦ୍ରମନ୍ତ୍ରୀ ରବିଶଙ୍କର ପ୍ରସାଦଙ୍କ ବିମାନ ଦୁର୍ଘଟଣାରୁ ବର୍ତ୍ତିବା । ସେହିପରି ଭୋଜପୁରୀ ଷ୍ଟାର ତଥା ବିଜେପି ସାଂସଦ ମନୋଜ ତିୱାରୀଙ୍କ ନିର୍ବାଚନ ପ୍ରଚାରକୁ ଯିବାବେଳେ ବିମାନ ସଂଯୋଗ ଖସିଯିବାପରେ ଅଳ୍ପକେ ଏକ ବଡ ଦୁର୍ଘଟଣାରୁ ସେ ବର୍ତ୍ତିଯାଇଥିଲେ ।
