ଚଣ୍ଡିଗଡ଼: ପଲିଥିନ ବନ୍ଦ କରିବାକୁ ସରକାରୀ ସ୍ତରରେ ବାରମ୍ବାର ସଚେତନ ବାର୍ତ୍ତା ଦିଆଯାଉଛି । ଏପରିକି ବିଭିନ୍ନ ଦୋକାନ ଗୁଡିକରେ ଚଢାଉ ହେଉଥିବା ଦେଖିବାକୁ ମିଳିଛି । ମାତ୍ର ଏସବୁ ସତ୍ତ୍ବେ ମଣିଷ ପଲିଥିନର ପିଛା ଛାଡ଼ିପାରୁନାହିଁ । ଆଉ ଏହି ପଲିଥିନ ବ୍ୟବହାର ପଶୁପକ୍ଷୀମାନଙ୍କ ପାଇଁ ବେଶ ମହଙ୍ଗା ସାବ୍ୟସ୍ତ ହେଉଛି । ଯାହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ହରିଆଣାର ହିସାର ଅଞ୍ଚଳରେ ।
ଏହି ଅଞ୍ଚଳରେ ଥିବା ତଲଓ୍ବଣ୍ଡି ରାଣା ଗୋଶାଳାରେ ଏକ ଗାଈ ଦୀର୍ଘଦିନରୁ ଯନ୍ତ୍ରଣାରେ ଛଟପଟ ହେଉଥିଲା । ଫଳରେ ଗୋଶାଳାର କର୍ମୀମାନେ ତାର ଚିକିତ୍ସା ପାଇଁ ପଶୁ ଚିକିତ୍ସାଳୟକୁ ନେଇଥିଲେ । ତେବେ ସେଠାରେ ଉକ୍ତ ଗାଈର ଚିକିତ୍ସା ପରେ ସମସ୍ତେ ଆଶ୍ଚର୍ଯ୍ୟ ହୋଇ ଯାଇଥିଲେ । ଗାଈ ପେଟରୁ ପାଖାପାଖି 45 କେଜି ଆବର୍ଜନା ବାହାରି ଥିଲା । ସେହି ଆବର୍ଜନାରେ ପଲିଥିନର ପରିମାଣ ଅଧିକ ରହିଥିବା ବେଳେ କିଛି ଲୁହା ଖଣ୍ଡ ଓ ରବର ମଧ୍ୟ ରହିଥିବା ଦେଖିବାକୁ ମିଳିଥିଲା ।
ତେବେ ଗାଈର ଅସ୍ତ୍ରୋପଚାର ପାଇଁ ଡାକ୍ତରଙ୍କୁ 7ରୁ 8 ଘଣ୍ଟା ସମୟ ଲାଗିଥିଲା । ଦୀର୍ଘ ସମୟ ଧରି ଅପରେସନ ପରେ ଉକ୍ତ ଗାଈଟି ବଞ୍ଚି ଯାଇଥିଲା । ତେବେ ଏହି ପଲିଥିନ ପାଇଁ ଅନ୍ୟ ପଶୁପକ୍ଷୀ ମାନେ ମଧ୍ୟ ଯନ୍ତ୍ରଣାରେ ଛଟପଟ ହେଉଥିବେ ସେଥିରେ ସନ୍ଦେହ ନାହିଁ ।