ନୂଆଦିଲ୍ଲୀ: କୋରୋନା ମହାମାରୀ ବିଶ୍ବରେ ଉତ୍କଟ ରୂପ ଧାରଣ କରିଥିବା ବେଳେ ଏହାର ମୁକାବିଲା ପାଇଁ ଦିନରାତି ପରିଶ୍ରମ କରୁଛନ୍ତି ଡାକ୍ତର, ସ୍ବାସ୍ଥ୍ୟକର୍ମୀ, ଗବେଷକ ଓ ବୈଜ୍ଞାନିକ । ଗୋଟିଏ ପଟେ ସଂକ୍ରମଣ ରୋକିବା ପାଇଁ ସ୍ବାସ୍ଥ୍ୟକର୍ମୀମାନେ ଉଦ୍ୟମ ଚଳାଇଥିବା ବେଳେ ଅନ୍ୟପଟେ ଏହାର ପ୍ରତିଷେଧକ ପାଇଁ ଚାଲିଛି ଚେଷ୍ଟା । ହେଲେ ଏସବୁ ଭିତରେ ବିଶ୍ବବାସୀଙ୍କ ମନରେ କୋରୋନା ମହାମାରୀକୁ ନେଇ ଗୁଜବ ସୃଷ୍ଟି କରିବାରେ ଏହି ପ୍ରମୁଖ ଭୂମିକା ବହନ କରିଛି ସୋସିଆଲ ମିଡିଆ ।
ଏମିତିରେ ଫେସବୁକରେ ଏହି କୋରୋନା ଅପପ୍ରଚାର ଓ ଗୁଜବ ହଟାଇବା ପାଇଁ କମ୍ପାନୀ ଆଣିଛି ଏକ ନୂଆ ସେକ୍ସନ । ଏହି ନୂଆ ସେକ୍ସନ ବା ବିଭାଗଟି ସ୍ବତନ୍ତ୍ର ଭାବେ କୋଭିଡ-19 ପାଇଁ ଉତ୍ସର୍ଗୀକୃତ ରହିବ । ଏହି ସେକ୍ସନଟି ବିଶ୍ବ ସ୍ବାସ୍ଥ୍ୟ ସଙ୍ଗଠନ ଦ୍ବାରା ଗୁଜବ ପ୍ରମାଣିତ ହୋଇଥିବା ସାଧାରଣ ତଥ୍ୟକୁ ଡିଲିଟ କରିବ । ଚଳିତ ସପ୍ତାହ ଏହି ସେକ୍ସନ ଲଞ୍ଚ ହେବାକୁ ଥିବା ବେଳେ ଏହାର ନାମ ‘କୋଭିଡ-19 ଇନଫର୍ମେସନ ସେଣ୍ଟର’ ରଖାଯିବା ନେଇ ଫେସବୁକ ସ୍ପଷ୍ଟ କରିଛି ।
ବର୍ତ୍ତମାନ ପରିସ୍ଥିତିରେ ୟୁଜର୍ସଙ୍କୁ ସଠିକ୍ ତଥ୍ୟ ପ୍ରଦାନ ସହ ସଚେତନ କରାଇବା ପାଇଁ ଏହା କମ୍ପାନୀର ଲାଟେଷ୍ଟ ପଦକ୍ଷେପ ହେବ ବୋଲି ଜଣା ପଡିଛି । ଏନେଇ ଫେସବୁକ ଓ ଅଧିକୃତ ଆପ୍ ଇନଷ୍ଟାଗ୍ରାମର ସବୁଠାରୁ ଉପରେ କୋରୋନା ସମ୍ବନ୍ଧୀୟ ତଥ୍ୟ ପ୍ରଦାନ କରିବା ପାଇଁ କମ୍ପାନୀ ନିଷ୍ପତ୍ତି ନେଇଛି । ଯେପରିକି ସାମାଜିକ ଦୂରତ୍ବ ବଜାୟ ରଖିବା ଓ ମାସ୍କ ପିନ୍ଧିବା ଆଦି ବାର୍ତ୍ତା କମ୍ପାନୀ ଲଗାତାର ନିଜ ୟୁଜର୍ସଙ୍କ ଯୋଗାଇବା ପାଇଁ ଯୋଜନା ପ୍ରସ୍ତୁତ କରିଛି ।
ଏହି ଯୋଜନା କାର୍ଯ୍ୟକାରୀ କରିବା ପାଇଁ କମ୍ପାନୀ ପ୍ରାୟ 2 ବିଲିୟନ ସ୍ବାସ୍ଥ୍ୟକର୍ମୀଙ୍କୁ ଏଥିରେ ସାମିଲ କରିଥିବା ସୂଚନା ଦେଇଛି । ଏଥିସହ ଜାନୁଆରୀ ମାସରୁ କୋରୋନା ଚିକିତ୍ସା ପାଇଁ ଆରମ୍ଭ ହୋଇଥିବା ଫଣ୍ଡରେ ୟୁଜର୍ସ 100ମିଲିୟନ ଡଲାର ସଂଗ୍ରହ କରିଥିବା କମ୍ପାନୀ ସ୍ପଷ୍ଟ କରିଛି ।
@IANS
