ବେଙ୍ଗାଲୁରୁ: କୁକୁର ମଣିଷର ସମ୍ପର୍କ ନିଆରା । ସାଧାରଣତଃ ପୋଷା କୁକୁରମାନେ ମାଲିକର ବେଶ ବିଶ୍ବସ୍ତ ହୋଇଥାନ୍ତି । ସମୟ ଆସିଲେ ନିଜ ଜୀବନକୁ ବାଜି ଲଗାଇବାକୁ ପଛଘୁଞ୍ଚା ଦିଅନ୍ତି ନାହିଁ ଏମାନେ । କୁକୁର ମାଲିକର ଜୀବନ ବଞ୍ଚାଇବା ଭଳି ଅନେକ ଘଟଣା ସାମ୍ନାକୁ ଆସିଛି । ମାଲିକର ଜୀବନ ବଞ୍ଚାଇବାକୁ କୁକୁର ନିଜ ଜୀବନ ଦେବାକୁ ମଧ୍ୟ ପଛାନ୍ତି ନାହିଁ । କିନ୍ତୁ ଏଠାରେ ନିଜ ମାଲିକର ମୃତ୍ୟୁରେ ଖାଇବା ଛାଡ଼ି ଦେଇ ଏକ କୁକୁରର ମୃତ୍ୟୁ ଘଟିଛି । ଏଭଳି ଏକ ଘଟଣା ଦେଖିବାକୁ ମିଳିଛି କର୍ଣ୍ଣାଟକ ବେଲାଗଭି ଜିଲ୍ଲା ମୋଡାଲାଗି ତାଲୁକର ଅବରାଡି ଗ୍ରାମରେ ।
ସୂଚନା ମୁତାବକ କୁକୁରର ମାଲିକ ଶଙ୍କରପ୍ପା ମଦିଭାଲସଙ୍କ ସେପ୍ଟେମ୍ବର 6ରେ ମୃତ୍ୟୁ ହୋଇଥିଲା । ମାଲିକଙ୍କ ମୃତ୍ୟୁ ପରେ କୁକୁର(କଦୀ) ତାଙ୍କୁ ସବୁ ଯାଗା ଖୋଜିଥିଲା, ଯେଉଁଠିକି ସେ ଆଗରୁ ତା’ ମାଲିକ ସହ ଯାଇଥିଲା । ହେଲେ ମାଲିକକୁ ନ ପାଇବାରୁ ଶେଷରେ ଖାଇବା ଛାଡ଼ିଦେଇଥିଲା କଦୀ। ଦୁର୍ଭାଗ୍ୟବଶତଃ ଗତକାଲି (ସୋମବାର) ମହାଲିଙ୍ଗପୁରମରେ କଦୀର ମୃତଦେହ ମିଳିଥିଲା। ଶେଷରେ ପରିବାର ଓ ଗ୍ରାମବାସୀ କଦୀର ମୃତଦେହ ଗ୍ରାମକୁ ଆଣି ଅନ୍ତିମ ସଂସ୍କାର କରିଥିଲେ। ଏବଂ କୁକୁରକୁ ତାର ମାଲିକ ଶଙ୍କରପ୍ପାଙ୍କ ସମାଧି ପାଖରେ ହିଁ ପୋତି ଦିଆଯାଇଥିଲା ।
ବ୍ୟୁରୋ ରିପୋର୍ଟ. ଇଟିଭି ଭାରତ
