ନୂଆଦିଲ୍ଲୀ: ଉତ୍ତର-ପୂର୍ବ ଦିଲ୍ଲୀର ହିଂସାକାଣ୍ଡ ସମୟରେ ପୋଲିସ ଉପରକୁ ଗୁଳି ଚଳାଇଥିବା ଯୁବକ ଶାହରୁଖ ଗିରଫ । ଉତ୍ତରପ୍ରଦେଶରୁ ଗିରଫ କଲା ଦିଲ୍ଲୀ କ୍ରାଇମବ୍ରାଞ୍ଚ ପୋଲିସ । ହିଂସା ସମୟରେ ପୋଲିସ ଉପରକୁ ସେ ଗୁଳି ଚଳାଇଥିବା ଦେଖିବାକୁ ମିଳିଥିଲା ।
ଘଟଣାପରେ ପୋଲିସ ଉକ୍ତ ଯୁବକକୁ ଗିରଫ କରିନଥିବାରୁ ପୋଲିସ ଉପରେ ଆଙ୍ଗୁଳି ଉଠିଥିଲା । ଏ ଘଟଣା ପରେ ଶାହରୁଖ ନିଜ ଘର ଉତ୍ତରପ୍ରଦେଶର ବରେଲୀ ଚାଲିଯାଇଥିଲା । ତଦନ୍ତ ପରେ ସେଠାରୁ ତାଙ୍କୁ କ୍ରାଇମବ୍ରାଞ୍ଚ ଗିରଫ କରିଛି ।
ସୂଚନା ଥାଉକି, ଉତ୍ତର-ପୂର୍ବ ଦିଲ୍ଲୀର ହିଂସାକାଣ୍ଡରେ 47 ଜଣ ଲୋକଙ୍କ ଜୀବନ ଯାଇଥିବାବେଳେ ଶତାଧିକ ଲୋକେ ଆହତ ହୋଇଛନ୍ତି । ଏହି ହିଂସାକାଣ୍ଡରେ ଜଣେ ପୋଲିସ କନେଷ୍ଟବଳ ଓ ଗୁଇନ୍ଦା ବିଭାଗର ଜଣେ ଅଧିକାରୀ ଅଙ୍କିତ ଶର୍ମାଙ୍କ ମୃତ୍ୟୁ ହୋଇଛି । ହିଂସାକାଣ୍ଡର ତଦନ୍ତ ପାଇଁ 2ଟି ସ୍ବତନ୍ତ୍ର ତଦନ୍ତକାରୀ ଦଳ କ୍ରାଇମବ୍ରାଞ୍ଚ ଗଠନ କରିଛି ।
ସେପଟେ ଦିଲ୍ଲୀ ହିଂସାକୁ ନେଇ ବାରମ୍ବାର ସଂସଦର ଉଭୟ ଗୃହ ମୁଲତବୀ ହେଉଥିବା ଦେଖିବାକୁ ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
