ନୂଆଦିଲ୍ଲୀ: ଶନିବାର ଦିଲ୍ଲୀ ବିଧାନସଭା ପାଇଁ ହୋଇଛି ଭୋଟ ଗ୍ରହଣ । ରବିବାର ନିର୍ବାଚନ କମିଶନ ମତଦାନ ହାର ଜାରି କରିଛନ୍ତି । ନିର୍ବାଚନ କମିଶନଙ୍କ ସୂଚନା ଅନୁସାରେ ଦିଲ୍ଲୀ ବିଧାନସଭା ପାଇଁ ମୋଟ 62.59 ପ୍ରତିଶତ ମତଦାନ ହୋଇଛି । କମିଶନ କହିଛନ୍ତି ସଂଧ୍ୟା ପର୍ଯ୍ୟନ୍ତ ଭୋଟ ଗ୍ରହଣ ହୋଇଥିଲା । ଯେଉଁଥିପାଇଁ ବିଳମ୍ବିତ ରାତ୍ରି ପର୍ଯ୍ୟନ୍ତ ତଥ୍ୟ ସଂଗ୍ରହ ଚାଲିଥିଲା ।
ଦିଲ୍ଲୀ ମୁଖ୍ୟ ନିର୍ବାଚନ ଅଧିକାରୀ ରଣବୀର ସିଂ କହିଛନ୍ତି ଦିଲ୍ଲୀ ବିଧାନସଭା ପାଇଁ ମୋଟ 62.59 ପ୍ରତିଶତ ମତଦାନ ହୋଇଛି । ଯାହା ବିଗତ ଲୋକସଭା ନିର୍ବାଚନ ଠାରୁ 2 ପ୍ରତିଶତ ଅଧିକ । କମିଶନ ଆହୁରି କହିଛନ୍ତି ଦିଲ୍ଲୀର କଲ୍ଲୀମାରାନ ବିଧାନସଭା ଆସନରେ ସର୍ବାଧିକ 71.6 ପ୍ରତିଶତ ମତଦାନ ହୋଇଛି । ସେହିପରି ଦିଲ୍ଲୀର ଛବନୀ ବିଧାନସଭା ଆସନରେ ସର୍ବନିମ୍ନ 45.4 ପ୍ରତିଶତ ହୋଇଛି ।
ନିର୍ବାଚନ କମିଶନଙ୍କ ଘୋଷଣା ପୂର୍ବରୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କମିଶନଙ୍କ କାର୍ଯ୍ୟଧାରାକୁ ନେଇ ପ୍ରଶ୍ନ ଉଠାଇଥିଲେ । କେଜ୍ରିୱାଲ କହିଥିଲେ ନିର୍ବାଚନ କମିଶନ କଣ କରୁଛନ୍ତି? ମତଦାନ ହେବାର କିଛି ଘଣ୍ଟାପରେ ଭୋଟ ପ୍ରତିଶତ ଘୋଷଣା ହେବାକଥା । କିନ୍ତୁ ଏପର୍ଯ୍ୟନ୍ତ କାହିଁକି କରାଯାଇ ନାହିଁ ବୋଲି ପ୍ରଶ୍ନ କରିଥିଲେ ?
ସେହିପିର ଦିଲ୍ଲୀ ଉପ-ମୁଖ୍ୟମନ୍ତ୍ରୀ ମନୀଷ ସିସୋଦିଆ ମଧ୍ୟ ନିର୍ବାଚନ କମିଶନଙ୍କୁ ସମାଲୋଚନା କରିବାକୁ ପଛାଇନଥିଲେ । ସିସୋଦିଆ କହିଥିଲେ ମତଦାନ ଶେଷ ହେବାର 24 ଘଣ୍ଟା ହେଲାଣି । ବିଜେପି ନେତାମାନେ କେତେ ଭୋଟିଂ ହୋଇଛି କହୁଛନ୍ତି, ଅଥଚ ନିର୍ବାଚନ କମିଶନ ଚୁପ । ଏଠି କଣ ଚାଲିଛି । କଣ ବିଜେପି ପାର୍ଟି ଅଫିସରୁ ଭୋଟିଂ ପ୍ରତିଶତ ମିଳିବ କି ବୋଲି ପ୍ରଶ୍ନ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
