ନୂଆଦିଲ୍ଲୀ: ରାଜ୍ୟରେ ସ୍ବାସ୍ଥ୍ୟ ସେବାରେ ଉନ୍ନତି ଆଣିବା ଲକ୍ଷ୍ୟରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ମୋହଲ୍ଲା କ୍ଲିନିକର ଶୁଭାରମ୍ଭ କରିଥିଲେ । ରାଜ୍ୟରେ 1 ହଜାର କ୍ଲିନିକ ଖୋଲିବାକୁ ସେ ନିଷ୍ପତ୍ତି ନେଇଥିଲେ । ତେବେ ଏହି କ୍ରମରେ ସେ ଆଜି 100 ମୋହଲ୍ଲା କ୍ଲିନିକର ଉଦଘାଟନ କରିଛନ୍ତି । ଏହା ସହିତ ଏହି କ୍ଲିନିକର ସଂଖ୍ୟା 300ରେ ପହଞ୍ଚିଛନ୍ତି ।
ଏନେଇ କେଜ୍ରିଓ୍ବାଲା ଟ୍ବିଟ ମାଧ୍ୟମରେ ସୂଚନା ଦେଇଛନ୍ତି । ସେ ଟ୍ବିଟର ଜରିଆରେ କହିଛନ୍ତି ଯେ, ଆଜି ଏହି 100 କ୍ଲିନିକର ଉଦଘାଟନ ପରେ ଏହାର ସଂଖ୍ୟା 300 ପାରେଇଛି । ରାଜ୍ୟର ଲକ୍ଷାଧିକ ଲୋକଙ୍କୁ ଉନ୍ନତ ସ୍ବାସ୍ଥ୍ୟ ସେବା ମିଳିପାରିବ ।
ସେ ଆହୁରି ମଧ୍ୟ କହିଛନ୍ତି କି, ଏଭଳି ହେବା ଦ୍ବାରା ଜଣେ ସାଧାରଣ ନାଗରିକ ସହଜ ଏବଂ ସୁବିଧାରେ ଉନ୍ନତ ସ୍ବାସ୍ଥ୍ୟ ସୁବିଧା ପାଇପାରିବ । ଏଭଳି ବ୍ୟବସ୍ଥା ଅନେକ ଲୋକଙ୍କ ଜୀବନରେ ପରିବର୍ତ୍ତନ ଆଣିଛି ବୋଲି ସେ କହିଥିଲେ । ଏହା ସହିତ ରାଜ୍ୟର ସ୍ବାସ୍ଥ୍ୟ ମନ୍ତ୍ରୀ ସତ୍ୟେନ୍ଦ୍ର ଜୈନ କହିଛନ୍ତି କି, ଦିଲ୍ଲୀ ସରକାର ସମସ୍ତ ମୋହଲ୍ଲା କ୍ଲିନିକରେ ସିସିଟିଭି ଲଗାଇବାର ବ୍ୟବସ୍ଥା କରିବେ ।
ସୂଚନା ଯୋଗ୍ୟ ବର୍ତ୍ତମାନ ଦିଲ୍ଲୀରେ ଚାଲୁଥିବା ମୋହଲ୍ଲା କ୍ଲିନିକ ମାଧ୍ୟମରେ ପାଖାପାଖି 1.69 କୋଟି ଲୋକଙ୍କୁ ସୁବିଧା ମିଳିପାରିଛି । ଏହି କ୍ଲିନିକରେ ପାଖାପାଖି 16 ଲକ୍ଷ ବିଭିନ୍ନ ପ୍ରକାର ପରୀକ୍ଷାନିରୀକ୍ଷା କରାଯାଇଛି । ପ୍ରତ୍ୟେକ କ୍ଲିନିକରେ ପ୍ରତିଦିନ ପାଖାପାଖି 35 ରୁ 40 ହଜାର ରୋଗୀ ଆସୁଥିବା ଜଣାପଡ଼ିଛି । ତେବେ ଏହା ସମଗ୍ର ଦିଲ୍ଲୀରେ ରୋଗୀଙ୍କ ଅନୁପାତରେ ମାତ୍ର 20 ପ୍ରତିଶତ ବୋଲି ସୂଚନା ମିଳିଛି ।
