ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନରେ ମୁଣ୍ଡ ଖେଳାଉଥିବା ପାକିସ୍ତାନ ମନ୍ତ୍ରୀଙ୍କୁ ଜବାବ ଦେଇଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ଏହା ସହିତ ଭାରତର ଆଭ୍ୟନ୍ତରୀଣ ପ୍ରସଙ୍ଗରେ ମୁଣ୍ଡ ନପୁରାଇବାକୁ ତାଙ୍କୁ ଉପଦେଶ ଦେଇଛନ୍ତି ସେ ।
କେଜ୍ରିୱାଲ ଟ୍ବିଟ କରି କହିଛନ୍ତି, 'ପ୍ରଧାନମନ୍ତ୍ରୀ ମୋଦି ଭାରତର ପ୍ରଧାନମନ୍ତ୍ରୀ । ସେ ମୋର ମଧ୍ୟ ପ୍ରଧାନମନ୍ତ୍ରୀ । ଦିଲ୍ଲୀ ନିର୍ବାଚନ ଭାରତର ଆଭ୍ୟନ୍ତରୀଣ ମାମଲା । ଏଥିରେ ଆମେ ଆତଙ୍କବାଦର ସବୁଠୁ ବଡ ପ୍ରୋତ୍ସାହନକାରୀର ହସ୍ତକ୍ଷେପକୁ ସହ୍ୟ କରିବୁ ନାହିଁ । ପାକିସ୍ତାନ ଯେତେ ଚେଷ୍ଟା କଲେ ମଧ୍ୟ ଦେଶର ଏକତା ଉପରେ ପ୍ରଭାବ ପକାଇପାରିବ ନାହିଁ ।'
ପାକିସ୍ତାନର ମନ୍ତ୍ରୀ ଚୌଧୁରୀ ଫୱାଦ ହୁସେନ ଟ୍ବିଟ କରି ପ୍ରଧାନମନ୍ତ୍ରୀ ମୋଦିଙ୍କୁ ହରାଇବା ପାଇଁ ଭାରତୀୟ ଜନତାଙ୍କୁ ଅପିଲ କରିଥିଲେ । ସେ ଲେଖିଥିଲେ, 'ଭାରତର ଲୋକ ମୋଦିଙ୍କୁ ହରାଇବା ଉଚିତ । ସେ ଆଉ ଏକ ରାଜ୍ୟ(ଦିଲ୍ଲୀ)ରେ ନିର୍ବାଚନ ହାରିବା ଚାପରେ କିଛି ବି ଦାବି କରୁଛନ୍ତି ଏବଂ ଲୋକଙ୍କୁ ଡରାଉଛନ୍ତି । କାଶ୍ମୀର, ନାଗରିକତା ସଂଶୋଧନ ଆଇନ୍ ଏବଂ ଆର୍ଥିକ ମାନ୍ଦାବସ୍ଥାକୁ ନେଇ ବିଶ୍ବର ଅନେକ ସ୍ଥାନକୁ ମିଳୁଥିବା ପ୍ରତିକ୍ରିୟା ପରେ ସେ ନିଜ ମାନସିକ ସନ୍ତୁଳନ ହରାଇଛନ୍ତି । '
