ନୂଆଦିଲ୍ଲୀ: ରାଫେଲ ଡିଲ ମାମଲାରେ ବୁଧବାର କେନ୍ଦ୍ର ସରକାର ସର୍ବୋଚ୍ଚ ନ୍ୟାୟାଳୟରେ ସତ୍ୟପାଠ ଦାଖଲ କରିଛନ୍ତି । ଏଥିପାଇଁ ପୂର୍ବରୁ ସରକାର ଅନୁମତି ମାଗିଥିବାବେଳେ ଗତକାଲି ସୁପ୍ରିମକୋର୍ଟ ଅନୁମତି ପ୍ରଦାନ କରିଥିଲେ । ରାଫେଲ ଯୁଦ୍ଧ ବିମାନ କ୍ରୟ ଚୁକ୍ତି ସମ୍ବନ୍ଧୀୟ କେତେକ ଫାଇଲ ପ୍ରତିରକ୍ଷା ମନ୍ତ୍ରଣାଳୟରୁ ଚୋରି ହୋଇଥିବା ମାମଲାରେ ଏହି ସତ୍ୟପାଠ ଦାଖଲ ହୋଇଛି ।
ତେବେ ଏହି ଲିକ୍ ପାଇଁ ସରକାର ରାଫେଲ ରାୟର ପୁନଃସମୀକ୍ଷା ଲାଗି ଆବେଦନ କରିଥିବା ଯଶବନ୍ତ ସିହ୍ନା, ଅରୁଣ ସୌରୀ ଏବଂ ପ୍ରଶାନ୍ତ ଭୂଷଣଙ୍କୁ ଦାୟୀ କରିଛନ୍ତି । ଏନେଇ ସତ୍ୟପାଠରେ ଦର୍ଶାଯାଇଛି ଯେ ବିନା ଅନୁମତିରେ ଏହି ସମ୍ବେଦନଶୀଳ ଦସ୍ତାବିଜର ଫଟୋ କପି ଗଣମାଧ୍ୟମରେ ପ୍ରକାଶ କରାଯାଇଛି । ଏଥିପାଇଁ ସରକାରଙ୍କଠାରୁ କୌଣସି ଅନୁମତି ନିଆଯାଇ ନାହିଁ । କାର୍ଯ୍ୟାଳୟରୁ ବେଆଇନ ଭାବେ ଫଟୋ କପି ନେଇ ଏହାକୁ ପ୍ରକାଶ କରାଯିବା ଚୋରି ସଙ୍ଗେ ସମାନ ବୋଲି କେନ୍ଦ୍ର ସରକାର ସତ୍ୟପାଠରେ ଉଲ୍ଲେଖ କରିଛନ୍ତି ।
ଏହି ସମ୍ବେଦନଶୀଳ ତଥ୍ୟ ପ୍ରଘଟ ପାଇଁ ଆବେଦନକାରୀ ବେଆଇନ ଭାବେ ନିଆଯାଇଥିବା ଫଟୋ କପିକୁ ସେମାନଙ୍କ ଆବେଦନ ସହ ଯୋଡିଥିଲେ । ଏହାସହ ଏହି ଯୁଦ୍ଧ ବିମାନର ରଣକୌଶଳ ସମ୍ପର୍କରେ ମଧ୍ୟ ତଥ୍ୟ ସାର୍ବଜନୀନ କରିଥିଲେ । ଦେଶର ଯୁଦ୍ଧ ବିମାନର ମାରକ କ୍ଷମତା ଏବଂ ଉଡାଣ କୌଶଳ ସଂକ୍ରାନ୍ତ ତଥ୍ୟ ଅତ୍ୟନ୍ତ ଗୋପନୀୟ ରଖାଯାଏ । କିନ୍ତୁ ଏମାନେ ଦେଶର ନିରାପତ୍ତାକୁ ସଙ୍କଟରେ ପକାଇ ଏଭଳି କାର୍ଯ୍ୟ କରିଥିବା କେନ୍ଦ୍ର ସରକାର ସତ୍ୟପାଠରେ କହିଛନ୍ତି ।
ଏଭଳି କାର୍ଯ୍ୟ ଦ୍ବାରା ଦେଶର ନିରାପତ୍ତା ବିପନ୍ନ ହୋଇଛି । ସରକାର ଏହି ତଥ୍ୟ ପ୍ରଘଟ ମାମଲାର ତଦନ୍ତ ଜାରି ରଖିଛନ୍ତି ବୋଲି ସତ୍ୟପାଠରେ ଦର୍ଶାଯାଇଛି । ଏହି କାମର ଉଦ୍ଦେଶ୍ୟ କେବଳ ସରକାରଙ୍କୁ ବଦନାମ କରି ଅଦାଲତରେ ବିଭ୍ରାନ୍ତି ସୃଷ୍ଟି କରିବା ପାଇଁ ବୋଲି ସତ୍ୟପାଠରେ ଉଲ୍ଲେଖ ରହିଛି । ଉଲ୍ଲେଖଯୋଗ୍ୟ ଯେ ଆଜି ଏହି ସତ୍ୟପାଠ ଉପରେ ସୁପ୍ରିମକୋର୍ଟ ଶୁଣାଣି କରିବେ । ରାଫେଲ ଚୁକ୍ତିର ତଦନ୍ତ ପାଇଁ ନିର୍ଦ୍ଦେଶ ଦିଆଯିବାକୁ ଦାବି କରି ସୁପ୍ରିମକୋର୍ଟରେ ହୋଇଥିବା ଆବେଦନର ପୁନଃ ସମୀକ୍ଷା କରିବାକୁ ପୁଣି ଆବେଦନକାରୀ ଦାବି କରିଥିଲେ । ଏହାସହ ଏଥିରେ କେତେକ ନୂତନ ଦସ୍ତାବିଜ ଯୋଡିଥିଲେ ଯାହାକୁ କୋର୍ଟ ଆଗ୍ରହ୍ୟ କରିଦେଇଥିଲେ ।
