ଭୋପାଳ: ଡାକ୍ତରଖାନାରେ ମରିଗଲା ମାନବିକତା । ମାତ୍ର 5ଟଙ୍କାର ରସିଦ ନଥିବାରୁ ରୋଗୀକୁ ଡାକ୍ତରଖାନାରେ ଚିକିତ୍ସା କରିଲେ ନାହିଁ । ଶେଷରେ ଡାକ୍ତରଖାନା ବାହାରେ ରାତିସାରା ଛଟପଟ ହୋଇ ପ୍ରାଣ ହରାଇଲା ରୋଗୀ । ଏପରି ଅଭାବନୀୟ ଘଟଣା ଘଟିଛି ମଧ୍ୟପ୍ରଦେଶ ରାଜ୍ୟର ଗୁନା ଜିଲ୍ଲା ଡାକ୍ତରଖାନାରେ ।
ଖବରମୁତାବକ, ଆରତୀ ନାମକ ଜଣେ ମହିଳା ବୁଧବାର ସନ୍ଧ୍ୟାରେ ସ୍ବାମୀ ସୁନୀଲ ଧାକଡଙ୍କ ସ୍ବାସ୍ଥ୍ୟ ଅବସ୍ଥା ଖରାପ ହେବାରୁ ତାଙ୍କୁ ଗୁନା ଜିଲ୍ଲା ଡାକ୍ତରଖାନା ନେଇ ଯାଇଥିଲେ । କିନ୍ତୁ ତାଙ୍କୁ ଡାକ୍ତରଖାନାରେ ଭର୍ତ୍ତି କରାଗଲା ନାହିଁ । କାରଣ ତାଙ୍କ ପାଖରେ 5ଟଙ୍କାର ରସିଦ କିଣିବାକୁ ଟଙ୍କା ନଥିଲା । ସୂଚନାଥାଉକି, ସେହି ଡାକ୍ତରଖାନାରେ ରୋଗୀଟିକୁ ଭର୍ତ୍ତି କରିବାକୁ ହେଲେ 5ଟଙ୍କାର ରସିଦ କାଟିବାକୁ ପଡେ । ତା' ପରେ ଯାଇ ରୋଗୀର ଚିକିତ୍ସା ହୋଇଥାଏ ।
ଉକ୍ତ ମହିଳା ଜଣକ ଅସୁସ୍ଥ ସ୍ବାମୀଙ୍କ ସହ ରାତି ସାରା ଡାକ୍ତରଖାନା ବାହାରେ ଆତ୍ମୀୟଙ୍କ ଅପେକ୍ଷାରେ ରାତି ପାହି ଗଲା । ଶେଷରେ ସକାଳେ 7ଟାରେ ରସିଦ କାଟିବାକୁ ମହିଳା ଜଣଙ୍କ ଯିବାବେଳେ 9ଟାରେ କାଉଣ୍ଟର ଖୋଲା ହେବ କହି ଡାକ୍ତରଖାନା କର୍ମଚାରୀ ତାଙ୍କୁ ପଠେଇ ଦେଲେ । ମାତ୍ର ସକାଳ 8ଟାରେ ତାଙ୍କ ଅସୁସ୍ଥ ସ୍ବାମୀ ପ୍ରାଣ ହରାଇ ସାରିଥିଲେ ।
ମହିଳା ଜଣଙ୍କ ଅଭିଯୋଗ କରିଛନ୍ତି ଯେ, ଠିକ୍ ସମୟରେ ଚିକିତ୍ସା କରାଯାଇଥିଲେ ସ୍ବାମୀଙ୍କ ଜୀବନ ବଞ୍ଚି ପାରିଥାନ୍ତା । କିନ୍ତୁ କେହି ରସିଦ ଦେଲେ ନାହିଁ , ତାଙ୍କର ଚିକିତ୍ସା ହେଲା ନାହିଁ । ସମସ୍ତଙ୍କୁ ଟଙ୍କା ନଥିବା କହିଲି ହେଲେ ବି କେହି ଶୁଣିଲେ ନାହିଁ ।
ସୁନୀଲଙ୍କ ଲଭ୍ ମ୍ୟାରେଜ ହୋଇଥିଲା । ତାଙ୍କର 2ବର୍ଷର ଶିଶୁପୁତ୍ର ମଧ୍ୟ ଅଛି ।
ଏପଟେ ଏହି ମାମଲା ପରେ ଡାକ୍ତର କୌଣସି ଉତ୍ତର ରଖିବାକୁ ନାରାଜ । ଏହି ଘଟଣା ପରେ ଡାକ୍ତରଖାନାର ପ୍ରବନ୍ଧନ ଉପରେ ପ୍ରଶ୍ନବାଚୀ ସୃଷ୍ଟି ହୋଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
