ଗୌହାଟି: ସିଏଏ ଆଇନକୁ ନେଇ ଲାଗିରହିଥିବା ପ୍ରତିବାଦର ସ୍ବର କମିବା ବଦଳରେ ବଢିଚାଲିଛି । ଦେଶର ଉତ୍ତର ପୂର୍ବାଞ୍ଚଳରେ ଦେଖାଦେଇଥିବା ଏହି ପ୍ରତିବାଦର ଛବି ବିଶେଷ କରି ଆସାମରେ ଦେଖିବାକୁ ମିଳିଛି । ଯାହା ଫଳରେ ପୁରା ଅଶାନ୍ତ ହୋଇ ଉଠିଛି ଆସାମ । ଆସାମ ରାଜଧାନୀ ଗୌହାଟି, ଦିବ୍ରୁଗଡ ସହର ଓ ତିନଶୁକିଆରେ ବିଶେଷ କରି ପୁଣିଥରେ କର୍ଫ୍ୟୁ ଲାଗି କରାଯାଇଛି। ଫଳରେ ଜନଜୀବନ ବ୍ୟାହାତ ହୋଇଉଠିଛି ।
ତେବେ ଧିରେ ଧିରେ ପରିସ୍ଥିତି ଶାନ୍ତ ହେବାରେ ଲାଗିଥିଲେ ମଧ୍ୟ ଖବର ଅନୁଯାୟୀ, ମଙ୍ଗଳବାର ସନ୍ଧ୍ୟା ସୁଦ୍ଧା ବିଶେଷ କରି ଦିବ୍ରୁଗଡରେ କର୍ଫ୍ୟୁ କଟକଣା ପୁଣି ଥରେ କରାଯାଇଛି । ଅନ୍ୟପଟେ ସିଏଏକୁ ନେଇ ରାଜ୍ୟରେ ଯେଉଁ ଅଶାନ୍ତି ବାତାବରଣ ଦେଖାଦେଇଥିଲା ସେହି ଅଭିଯୋଗରେ ସୋମବାର 23 ଜଣଙ୍କୁ ଗିରଫ କରାଯାଇଛି ।
ପୋଲିସ ବିଭିନ୍ନ ଆଡକୁ ନଜରରେ ରଖି ଏହି ଗିରଫଦାରୀ ଜାରି ରଖିଛି । ସିସିଟିଭି ଫୁଟେଜ ଠାରୁ ଆରମ୍ଭ କରି ମୋବାଇଲ ଭିଡିଓକୁ ଆଧାର କରି ଏହି ଗିରଫଦାରୀ କରୁଛି ପୋଲିସ ।
ସେପଟେ ବର୍ତ୍ତମାନ ସୁଦ୍ଧା ଏହି ମାମଲାରେ 75ଟି ମାମଲା ଦାୟର ହୋଇଥିବା ବେଳେ ହିଂସା ସମୟର ପ୍ରମାଣ ଯିଏ ବି ଦେବ ସେମାନଙ୍କ ପାଇଁ ପୁରସ୍କାର ରାଶିର ବି ଘୋଷଣା କରାଯାଇଛି ।
