ମୁମ୍ବାଇ: ପୁଣି ଭାଇରାଲ ହେଲା ବିଧାୟକଙ୍କ ଦବଙ୍ଗଗିରି । ଓଡିଶାର ପାଟଣାଗଡ ପରେ ପୁଣି ଜଣେ ଇଞ୍ଜିନିଅର ବାବୁ ବିଧାୟକଙ୍କ ଆକ୍ରୋଶର ଶିକାର ହୋଇଛନ୍ତି । ମହାରାଷ୍ଟ୍ରର କଂଗ୍ରେସ ବିଧାୟକ ନିତେଶ ନାରାୟଣ ରାଣେ ଓ ତାଙ୍କ ସମର୍ଥକମାନେ ମୁମ୍ବାଇ-ଗୋଆ ହାଇୱେ ନିକଟରେ ଜଣେ ଇଞ୍ଜିନିୟରଙ୍କ ଉପରେ କାଦୁଅ ଫୋପାଡୁଥିବା ଘଟଣା ଭାଇରାଲ ହେବାରେ ଲାଗିଛି । ଇଞ୍ଜିନିୟରଙ୍କ ଅଧୀନରେ ହୋଇଥିବା ରାସ୍ତାକାମ ନିମ୍ନମାନର ହୋଇଥିବାରୁ ବିଧାୟକ ଏପରି ଆଚରଣ କରିଥିବା କୁହାଯାଉଛି ।
ଭାଇରାଲ ହୋଇଥିବା ଭିଡିଓରେ ବିଧାୟକ ଇଞ୍ଜିନିୟରଙ୍କ ଉପରେ ବିରକ୍ତ ହେଉଥିବାର ଦେଖିବାକୁ ମିଳିଛି । ନିର୍ମାଣସ୍ଥଳରେ ଏକ ସର୍ଭିସ ରୋଡ ନ ହେବାରୁ ସେ ଏପରି କରିଥିବା ଜଣାପଡିଛି । ରାସ୍ତା ପାଇଁ ସ୍ଥାନୀୟ ବାସିନ୍ଦାଙ୍କ ସମସ୍ୟାକୁ ନେଇ ଇଞ୍ଜିନିଅରଙ୍କୁ ବିଧାୟକ ଅନେକ ପ୍ରଶ୍ନ ପଚାରୁଥିବା ଭିଡିଓରେ ଦେଖିବାକୁ ମିଳିଛି । କେବଳ ଏତିକି ନୁହେଁ ଇଞ୍ଜିନିଅରଙ୍କ ଉପରେ ଖପ୍ପା ବିଧାୟକ ନିଜ ସମର୍ଥକମାନଙ୍କୁ କାଦୁଅ ଫୋପାଡିବାକୁ ନିର୍ଦ୍ଦେଶ ଦେଇଥିଲେ ।
ଉଲ୍ଲେଖଯୋଗ୍ୟ, ନିତେଶ ନାରାୟଣ ରାଣେ ମହାରାଷ୍ଟ୍ର କଂଗ୍ରେସ ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନାରାୟଣ ରାଣେଙ୍କ ପୁତ୍ର ଅଟନ୍ତି । ପୂର୍ବରୁ ଗତ ସପ୍ତାହରେ ମଧ୍ୟ ବିଜେପି ନେତା କୈଳାସ ବିଜୟଭର୍ଗ୍ୟଙ୍କ ପୁଅ ଆକାଶ ବିଜୟଭର୍ଗ୍ୟ ମଧ୍ୟ ଜଣେ ପ୍ରଶାସନିକ ଅଧିକାରୀଙ୍କୁ ଗୋଡାଇ ଗୋଡାଇ ବ୍ୟାଟରେ ପିଟୁଥିବା ଦେଖିବାକୁ ମିଳିଥିଲା । ଏହି ମାମଲାରେ ସେ ଗିରଫ ହୋଇ ଜାମିନରେ ଆସିଛନ୍ତି ।
