ନୂଆଦିଲ୍ଲୀ: ଖାଲି ଅପରାଧକୁ ରୋକିବା କିମ୍ବା ଆମକୁ ସୁରକ୍ଷା ଦେବା ନୁହେଁ । ଅନେକ ସମୟରେ ପୋଲିସ ଓ ଯବାନମାନେ ଲୋକଙ୍କୁ ଅନେକ ପ୍ରକାର ସାହାଯ୍ୟ କରୁଥିବା ଘଟଣା ସାମ୍ନାକୁ ଆସିଛି । ସେହିଭଳି ଏକ ଘଟଣା ନୂଆଦିଲ୍ଲୀସ୍ଥିତ ଆଇଜିଆଇ ଏୟାରପୋର୍ଟ ମେଟ୍ରୋଷ୍ଟେସନରେ ଦେଖିବାକୁ ମିଳିଛି । ଷ୍ଟେସନରେ ଏକ ଟଙ୍କା ଭର୍ତ୍ତି ବ୍ୟାଗ ମିଳିଥିବାବେଳେ ଜଣେ ଯାତ୍ରୀଙ୍କୁ ଏହା ଫେରାଇଦେଇଛନ୍ତି ସିଆଇଏସଏଫ ଯବାନ।
ସିଆଇଏସଏଫ ଯବାନଙ୍କ କହିବାମୁତାବକ, ମେଟ୍ରୋ ଷ୍ଟେସନରେ ଡ୍ୟୁଟିରେ ଥିବା ଜଣେ ସବ ଇନ୍ସପେକ୍ଟର ଗଣେଶ ରାମ ଯାଦବ ଏକ୍ସ-ରେ ମେସିନ ଆଇଟପୁଟ ରୋଲର ଉପରେ ତାଙ୍କୁ ଏକ ଟଙ୍କା ଭର୍ତ୍ତି ବ୍ୟାଗ ମିଳିଥିଲା । ଏହାପରେ ସେ ସମସ୍ତ ଯାତ୍ରୀଙ୍କୁ ପଚାରିଥିଲେ । କିନ୍ତୁ ବ୍ୟାଗ ବିଷୟରେ କେହି କିଛି କହିନଥିଲେ । ଏହାପରେ ଗଣେଶ ଷ୍ଟେସନ କଣ୍ଟ୍ରୋଲର ଓ ତାଙ୍କ ସିନିଅର ଅଫିସରଙ୍କୁ ଜଣାଇଥିଲେ ।
ଏହାପରେ ସୁରକ୍ଷା ଦୃଷ୍ଟିରୁ ସିଆଇଏସଏଫ ଯବାନଙ୍କ ଦ୍ବାରା ବ୍ୟାଗର ଯାଞ୍ଚ କରାଯାଇଥିଲା । ଏହାପରେ ଷ୍ଟେସନ କଣ୍ଟ୍ରୋଲରଙ୍କ ସାମ୍ନାରେ ଖୋଲାଯାଇଥିଲା । ଏଥିରୁ 2 ଲକ୍ଷ ଟଙ୍କା ଓ କିଛି ଡକ୍ୟୁମେଣ୍ଟ ମିଳିଥିଲା । ଯେଉଁଥିରୁ ଜଣାପଡିଥିଲା ଯେ, ବ୍ୟାଗଟି ଗୁରୁସିମରନ ସିଂହ ନାମଙ୍କ ଜଣେ ବ୍ୟକ୍ତିଙ୍କର ।
ଏହାର କିଛି ସମୟ ପରେ ଗୁରସିମରନ ସିଂହ ମେଟ୍ରୋ ଷ୍ଟେସନ ଆସି ଏକ୍ସ-ରେ ମେସିନ ଆଇଟପୁଟ ରୋଲର ଉପରେ ଏକ ଟଙ୍କା ଭର୍ତ୍ତି ବ୍ୟାଗ କଥା ପଚାରିଥିଲେ । ଏହାପରେ ସମସ୍ତ ପଚରାଉଚରା ଓ ଯାଞ୍ଚ ପରେ ଉକ୍ତ ବ୍ୟାଗଟିକୁ ଦିଆଯାଇଥିଲା ।
