ନୂଆଦିଲ୍ଲୀ: ପୂର୍ବ ଲଦାଖର ନିୟନ୍ତ୍ରଣ ରେଖାରେ ଭାରତ-ଚୀନ ମଧ୍ୟରେ ଜାରି ବିବାଦ ଶେଷ ହେବାର ନାଁ ନେଉନାହିଁ । ଚୀନର ପିପୁଲ୍ସ ଲିବରେସନ୍ ଆର୍ମି ଫିଙ୍ଗର ଅଞ୍ଚଳରୁ ସୈନ୍ୟ ପ୍ରତ୍ୟାହାର କରିଥିବା ଦୃଶ୍ୟମାନ ହେଉନାହିଁ । ଯାହାକୁ ଦୃଷ୍ଟିରେ ରଖି ଚୀନ ଷ୍ଟଡି ଗ୍ରୁପର ଏକ ଗୁରୁତ୍ବପୂର୍ଣ୍ଣ ବୈଠକ ହୋଇଛି । ଏହି ବୈଠକରେ ପୂର୍ବ ଲଦାଖ ସେକ୍ଟରର ସ୍ଥିତି ବିଷୟରେ ଆଲୋଚନା ହୋଇଥିବା ଜଣାପଡିଛି ।
ସିଏସଜି ବୈଠକରେ ବୈଦେଶିକ ବ୍ୟାପାର ମନ୍ତ୍ରୀ, ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କ ସମେତ ସରକାରଙ୍କ ଗୁରୁତ୍ୱପୂର୍ଣ୍ଣ ସଦସ୍ୟ ଏବଂ ସାମରିକ ତଥା ଅନ୍ୟାନ୍ୟ ସରକାରୀ ଏଜେନ୍ସିର ପ୍ରତିନିଧୀ ସାମିଲ ହୋଇଥିଲେ । ଏହି ବୈଠକ ଜୁଲାଇ 28 ରେ ଅନୁଷ୍ଠିତ ହୋଇଥିଲା । ସିଏସଜି ବୈଠକରେ ଲଦାଖ ସେକ୍ଟରରେ ସ୍ଥିତି ଉପରେ ଆଲୋଚନା କରାଯାଇଥିଲା । ତେବେ ଫିଙ୍ଗର ଅଞ୍ଚଳ ସମେତ ସମସ୍ତ ସଂଘର୍ଷ ପଏଣ୍ଟରୁ ଚୀନ ସମ୍ପୂର୍ଣ୍ଣ ଭାବରେ ସୈନ୍ୟ ପ୍ରତ୍ୟାହାର କରିବା ନେଇ ଭାରତ ପ୍ରୟାସ କରୁଛି । ଏଥି ପ୍ରତି ଦୃଷ୍ଟି ଦେବା ନେଇ ବୈଠକରେ ଆଲୋଚନା ହୋଇଥିଲା ।
ସିଏସଜି ସରକାରଙ୍କ ଏକ ସର୍ବୋଚ୍ଚ ସଂସ୍ଥା ମଧ୍ୟରୁ ଅନ୍ୟତମ । ଏହି ସଂସ୍ଥା ଚୀନ ସହ ଆଲୋଚନା ସମୟରେ ନେବାକୁ ଥିବା ପଦକ୍ଷେପ ସମ୍ପର୍କରେ ସାମରିକ ତଥା କୂଟନୀତିଜ୍ଞମାନଙ୍କୁ ଦିଶା-ନିର୍ଦ୍ଦେଶ ଦେଇଥାଏ । ଏହା ବ୍ୟତୀତ ଚୀନ ପକ୍ଷରୁ ଉଠାଯାଇଥିବା ପଏଣ୍ଟ ଏବଂ ଦାବି ଉପରେ ପକ୍ଷ ରଖିଥାଏ ।
ଭାରତ ଏବଂ ଚୀନ ମଧ୍ୟରେ ଶେଷ ଆଲୋଚନା ପରେ ଚୀନ ଫିଙ୍ଗର ଅଞ୍ଚଳରେ ସୈନ୍ୟ ପ୍ରତିୟାହାର ପ୍ରକ୍ରିୟା ଆରମ୍ଭ କରିଥିଲା । କିନ୍ତୁ 2-3 ଦିନ ପରେ ଏହି ପ୍ରକ୍ରିୟା ସମ୍ପୂର୍ଣ୍ଣ ବନ୍ଦ ହୋଇଯାଇଥିଲା । ଉଭୟ ପକ୍ଷ ମଧ୍ୟରେ ଆଲୋଚନା ପରେ ଚୀନ ପାଟ୍ରୋଲିଂ ପଏଣ୍ଟ 14 (ଗଲୱାନ ଘାଟି), 15-16 (ହଟ୍ ସ୍ପ୍ରିଙ୍ଗସ୍), ପାଟ୍ରୋଲିଂ ପଏଣ୍ଟ 17 ଏ (ଗୋଗ୍ରା) ରୁ ସୌନ୍ୟ ପ୍ରତ୍ୟାହାର କରିନେଇଛି । କିନ୍ତୁ ପାଗୋଙ୍ଗ ସୋରୁ ପଛକୁ ଯିବାକୁ ପ୍ରସ୍ତୁତ ହେଉନାହିଁ ଚୀନ ।
