ନୂଆଦିଲ୍ଲୀ: ଦୁର୍ନୀତି ବିରୋଧରେ ଏକ ସ୍ବତନ୍ତ୍ର ଅଭିଯାନ ଆରମ୍ଭ କରିଛି କେନ୍ଦ୍ରୀୟ ତଦନ୍ତକାରୀ ସଂସ୍ଥା (ସିବିଆଇ)। ଏହି କ୍ରମରେ ଶୁକ୍ରବାର ଦେଶର ୧୫୦ଟି ସ୍ଥାନରେ ସିବିଆଇ ଚଢାଉ କରିଛି । ଦୁର୍ନୀତିଗ୍ରସ୍ତର ସମ୍ଭାବନା ଥିବା ସମସ୍ତ ସ୍ଥାନରେ ସିବିଆଇ ପକ୍ଷରୁ ଚଢାଉ କରାଯାଇଛି ।
ତେବେ ଦେଶର ପ୍ରମୁଖ ସହର ଦିଲ୍ଲୀ, ମୁମ୍ବାଇ, ହାଇଦ୍ରାବାଦ, କୋଲକାତା, ଜୟପୁର, ଯୋଧପୁର, ଗୌହାଟୀ, ଶ୍ରୀନଗର, ସିଲଂ, ଚେନ୍ନାଇ, ଚଣ୍ଡିଗଡ, ଶିମଲା, ମଦୁରାଇ, ବେଙ୍ଗାଲୁରୁ, ଗାନ୍ଧୀନଗର, ଗୋଆ, ଜବଲପୁର ଏବଂ ଭୋପାଲର ବିଭିନ୍ନ ସ୍ଥାନରେ ସିବିଆଇ ପକ୍ଷରୁ ଏହି ଚଢାଉ କରାଯାଇଛି । ଛୋଟ ବ୍ୟବସାୟୀ ଓ ସାଧାରଣ ଲୋକ କେତେକ ଦୁର୍ନୀତିଗ୍ରସ୍ତ ସରକାରୀ ବିଭାଗ ଦ୍ବାରା ଭ୍ରଷ୍ଟାଚାରର ଶିକାର ହେଉଥିବା ଅଭିଯୋଗ କରିଥିଲେ । ଏହି ଅଭିଯୋଗ ଆଧାରରେ ସିବିଆଇ ପକ୍ଷରୁ ଚଢାଉ ଅଭିଯାନ ଆରମ୍ଭ କରାଯାଇଛି।
ସିବିଆଇ ରେଲୱେ, ପରିବହନ, ବିଏସଏନଏଲ ଏବଂ କୋଇଲା ଖଣି ସମେତ ଅନେକ ବିଭାଗରେ ଚଢାଉ କରିଛି ।
