ଲକ୍ଷ୍ନୌ: ନାଗରିକତା ସଂଶୋଧନ ଆଇନକୁ ନେଇ ଉତ୍ତର ପ୍ରଦେଶରେ ହୋଇଥିବା ହିଂସାତ୍ମକ ପ୍ରଦର୍ଶନରେ ଏବେ ରାଜନୈତିକ ହାତ ଥିବା ଖବର ସାମ୍ନାକୁ ଆସୁଛି । ଏହି ରକ୍ତାକ୍ତ ବିକ୍ଷୋଭରେ ସମାଜବାଦୀ ପାର୍ଟିର ସାଂସଦ ଆଜମ ଖାନଙ୍କ ସମ୍ପର୍କୀୟଙ୍କ ହାତ ଥିବା ଅନୁମାନ କରାଯାଉଛି ।
ମାମଲା ସାମ୍ନାକୁ ଆସିବା ପରେ ପୋଲିସ ଯାଞ୍ଚରେ ଲାଗିପଡିଛି । ହିଂସା ବେଳେ ଚିହ୍ନଟ ହୋଇଥିବା 150 ଅଭିଯୁକ୍ତଙ୍କ ମଧ୍ୟରୁ କିଛି ଲୋକ ଆଜମଙ୍କ ସମ୍ପର୍କୀୟ ବୋଲି କୁହାଯାଉଛି ।
ହିଂସାରେ ଆଜମ ଖାନଙ୍କ ସମ୍ପର୍କୀୟଙ୍କ ହାତ ଥିବା ଖବର ସାମ୍ନାକୁ ଆସିବା ପରେ ପୋଲିସ 21 ତାରିଖରେ ହୋଇଥିବା ପଥରଫିଙ୍ଗା, ହିଂସାର ଷଡଯନ୍ତ୍ର ରଚିଥିବା ରାଜନୈତିକ ଦଳକୁ ନେଇ ଯାଞ୍ଚରେ ଲାଗି ପଡିଛି ।
ଗତ 21 ରାମପୁରରେ ସମାଜବାଦୀ ପାର୍ଟି ନେତା ପ୍ରଶାସନକୁ ଅନୁମତି ମାଗିଥିଲେ । ରାମପୁର ପ୍ରଶାସନ ପକ୍ଷରୁ ଅନୁମିତି ମିଳି ନଥିବା ସତ୍ତ୍ବେ ବି କାର୍ଯ୍ୟକର୍ତ୍ତା ପ୍ରଦର୍ଶନ ପାଇଁ ଲୋକଙ୍କୁ ରାସ୍ତାକୁ ଡକାଇଥିଲେ । ପରେ ପ୍ରଦର୍ଶନକାରୀ ପୋଲିସ ବ୍ୟାରିକେଡ ଭାଙ୍ଗିବା ସହ ପଥର ଫିଙ୍ଗିଥିଲେ । ହିଂସା ପ୍ରଦର୍ଶନ ସମୟରେ ଅନେକ ପୋଲିସକର୍ମୀ ଆହତ ହୋଇଥିଲେ ।
