ଲକ୍ଷ୍ନୌ: ଦେଶର ବିଭିନ୍ନ ସ୍ଥାନରେ ନାଗରିକତା ସଂଶୋଧନ ଆଇନକୁ ବିରୋଧ ପ୍ରଦର୍ଶନ ଜାରି ରହିଛି। ଦିଲ୍ଲୀ ପରେ ବର୍ତ୍ତମାନ ଉତ୍ତରପ୍ରଦେଶରେ ଏହାର ପ୍ରଭାବ ଦେଖିବାକୁ ମିଳିଛି। ଏପରିକି ସମଗ୍ର ରାଜ୍ୟରେ 144 ଧାରା ଜାରି କରାଯାଇଛି। ଜାମିୟାମିଲିୟା ଓ ଏଏମୟୁ ପରେ ଲକ୍ଷ୍ନୌରେ ନାବଡା କଲେଜ ଆଗରେ ଆନ୍ଦୋଳନକାରୀ ପ୍ରତିବାଦ କରୁଛନ୍ତି। ଏପରିକି ଛାତ୍ରଙ୍କୁ କ୍ୟାମ୍ପସ ବାହାରକୁ ଆସିବାକୁ ଦେଉନାହିଁ ପୋଲିସ।
ଏହାସହ ନଦବତୁଲ ଉଲେମା କଲେଜରେ ମଧ୍ୟ ସକାଳୁ ଛାତ୍ର ଏକାଠି ହୋଇ ବିରୋଧ ପ୍ରଦର୍ଶନ କରିଥିଲେ। ଛାତ୍ରଙ୍କୁ କଲେଜ ପରିସରରେ ବାହାରକୁ ଆସିବାକୁ ଦିଆଯାଉନଥିଲା। ସେମାନେ କଲେଜ ପରିସରରୁ ଢେଲାପଥର ମାଡ କରିଥିଲେ। ହେଲେ ଏଥିରେ କାହାର କୌଣସି କ୍ଷତି ହୋଇନଥିବା ଜଣାଇଛନ୍ତି ପୋଲିସ ଡିଜି ଓ ପି ସିଂହ।
ରାଜଧାନୀ ଲକ୍ଷ୍ନୌ ସମେତ ରାଜ୍ୟର ବିଭିନ୍ନ ସ୍ଥାନରେ ନାଗରିକତା ସଂଶୋଧନ ଆିନ ବିରୋଧରେ ପ୍ରତିବାଦ ଦେଖିବାକୁ ମିଳିଥିଲା। ଅନ୍ୟପକ୍ଷେ ଆଲିଗଡର ବରିଷ୍ଠ ପୋଲିସ ଅଧିକାରୀ ଆକାଶ କୁଲହାରୀଙ୍କ କହିବା ଅନୁସାରେ, ଆଲିଗଡ ମୁସଲିମ୍ ୟୁନିଭର୍ସିଟିରେ ଏଯାବତ୍ ସ୍ଥିତି ସୁରକ୍ଷିତ ଅଛି। 25-30 ଛାତ୍ର ହଷ୍ଟେଲ ଖାଲି କରି ସାରିଲେଣି। ଏ ଘଟଣାରେ 21 ଜଣଙ୍କୁ ଗିରଫ କରାଯିବା ସହ 56ଜଣଙ୍କ ବିରୋଧରେ ମାମଲା ରୁଜୁ ହୋଇଛି।
ଏହାବ୍ୟତୀତ ପ୍ରୟାଗରାଜସ୍ଥିତ ଆହ୍ଲାବାଦ ବିଶ୍ବବିଦ୍ୟାଳରେ ଛୁଟି ଘୋଷଣା କରାଯାଇଛି। ଏଏମୟୁ ଓ ଜାମିୟାମିଲିୟାକୁ ଦୃଷ୍ଟିରେ ରଖି ଏହି ପଦକ୍ଷେପ ଗ୍ରହଣ କରାଯାଇଛି। ଏହାସହିତ ବିଶ୍ବବିଦ୍ୟାଳୟରେ ହେବାକୁ ଥିବା ପରୀକ୍ଷାକୁ ସ୍ଥଗିତ ରଖାଯାଇଛି। ଏହାସହ ହାଇଦ୍ରାବାଦର ଆଜାଦ ମୌଲନା ବିଶ୍ବବିଦ୍ୟାଳୟରେ ମଧ୍ୟ ଏହାକୁ ନେଇ ବିରୋଧ ପ୍ରଦର୍ଶନ କରାଯାଇଛି।
