ଲକ୍ଷ୍ନୌ: ବରକୁ ମହଙ୍ଗା ପଡିଲା ଯୌତୁକ ମାଗିବା । ଶେଷରେ ଲୋଭୀ ବରକୁ ଉଚିତ୍ ଶିକ୍ଷା ଦେଲା କନ୍ୟା । ଉତ୍ତର ପ୍ରଦେଶ କାସଗଞ୍ଜର ଗଞ୍ଜାଡୁଣ୍ଡୱାରାରେ ଜଣେ କନ୍ୟା ବରକୁ ଏପରି ଶିକ୍ଷା ଦେଲା ଯେ ଶେଷରେ ବର ନିଜ ବରଯାତ୍ରୀ ଫେରାଇ ଘରକୁ ଫେରିଛି ।
ସୂଚନା ଅନୁଯାୟୀ, ଗତ ଶନିବାର ଗଞ୍ଜାଡୁଣ୍ଡୱାରାରେ କୁୱର ପାଲଙ୍କ ଝିଅ ମୋନିକାଙ୍କ ବିବାହ ଥିଲା । ତେବେ ଦିଲ୍ଲୀର ମଙ୍ଗଲପୁରୀରୁ ବର ପକ୍ଷ ବରଯାତ୍ରୀ ନେଇ ଆସିଥିଲେ । ମାତ୍ର ବରପକ୍ଷ ବାରମ୍ବାର କନ୍ୟାପକ୍ଷକୁ ଯୌତୁକ ମାଗୁଥିଲେ । ଏମିତିକି ବିବାହର ବରମାଳା ସମୟରେ ମଧ୍ୟ କନ୍ୟାଙ୍କ ପିତାଙ୍କୁ ବର ଘର ଲୋକେ ଯୌତୁକ ମାଗୁଥିଲେ । ଶେଷରେ ଏହାର ବିରୋଧ କରି ମୋନିକା ବିବାହ କରିବାକୁ ମନା କରିଦେଇଥିଲେ ।
ତେବେ ମୋନିକାଙ୍କ କହିବା ଅନୁଯାୟୀ, ବର ସହ ତାଙ୍କର ନିର୍ବନ୍ଧ ସରିଥିଲା । ଯେଉଁଠି ବରଙ୍କ ପିତା ତାଙ୍କ ସ୍ବଇଚ୍ଛାରେ କୌଣସି ଯୌତୁକ ନେବାକୁ ମନା କରିଦେଇଥିଲେ । ମାତ୍ର କିଛି ଦିନ ପରେ ସେ କଲ କରି ନଗଦ 5 ଲକ୍ଷ ଟଙ୍କା, 2 ଭରୀ ସୁନା, 2 ଭରିର ଚେନ୍ ଏବଂ ଏକ ଭରି ମୁଦି ଯୌତୁକ ମାଗିଥିଲେ ।
ଏହାପରେ ଗତ 13 ତାରିଖ ଦିନ ମୋନିକାଙ୍କ ବାପା ଲଗ୍ନ ନେଇ ବର ଘରକୁ ଯାଇ ବରପକ୍ଷ ମାଗିଥିବା ସମସ୍ତ ଯୌତୁକ ଦେଇ ଆସିଥିଲେ । ମାତ୍ର ଗୋଟିଏ ଦିନ ପରେ ମୋନିକାଙ୍କ ଫୋନକୁ ମଧ୍ୟ କଲ କରି ବରପକ୍ଷ ଯୌତୁକ ମାଗିବା ଆରମ୍ଭ କରିଥିଲେ । ଶେଷରେ ସେ ନିଷ୍ପତ୍ତି ନେଇଥିଲେ ସେ ଏହି ବିବାହ କରିବେନି । ଯାହାଫଳରେ ସେ ବିବାହ ଦିନ ବେଦୀରେ ବିବାହ କରିବାକୁ ମନା କରିଦେଇଥିଲେ ।
