ନୂଆଦିଲ୍ଲୀ: ରାଜସ୍ଥାନର ବର୍ତ୍ତମାନର ରାଜନୀତି ଓ ଫୋନ ଟ୍ୟାପିଂ ମାମଲାକୁ ନେଇ କଂଗ୍ରେସ ଉପରେ ବର୍ଷିଲା ବିଜେପି । ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ପ୍ରେସମିଟ୍ କରି କଂଗ୍ରେସ ଉପରେ ବର୍ଷିଛନ୍ତି ।
ଏହାସହ ରାଜସ୍ଥାନରେ ଏପରି ସ୍ଥିତି ରାଜ୍ୟରେ ଜରୁରୀକାଳିନ ସ୍ଥିତି ନୁହେଁ କି ବୋଲି ପ୍ରଶ୍ନ କରିଛନ୍ତି । ଫୋନ ଟ୍ୟାପିଂ ଉପରେ ନିଜର ମତ ରଖି କଣ ସବୁ ଦଳର ଫୋନ ଟ୍ୟାପିଂ କରାଯାଉଛି କି ବୋଲି ସେ ପ୍ରଶ୍ନ କରିଛନ୍ତି ।
ସେହିପରି ହାଇକମାଣ୍ଡ ସହ ଲଢେଇ ହାଇକୋର୍ଟରେ ପହଞ୍ଚିଛି । କଂଗ୍ରେସର ଘର କଳି ଏବେ ରାସ୍ତାରେ ପହଞ୍ଚିଛି ବୋଲି ସେ କହିଛନ୍ତି । ଏହାସହ ଏସବୁ ମାମଲାର ସିବିଆଇ ତଦନ୍ତ କରାଯାଉ ବୋଲି ସେ ଦାବି କରିଛନ୍ତି ।
ଏହି ଅବସରରେ ସମ୍ବିତ, ଅଶୋକ ଗେହଲଟ ସରକାରଙ୍କୁ ଅନେକ ପ୍ରଶ୍ନ ପଚାରିଛନ୍ତି । ସେ କହିଛନ୍ତି, କଣ ଫୋନ ଟ୍ୟାପିଂ ସାର୍ବଜନିକ ପ୍ରସଙ୍ଗ ନୁହେଁ ? ରାଜସ୍ଥାନରେ ଜରୁରୀକାଳିନ ପରି ସ୍ଥିତି କାହିଁକି ରହିଛି ?
ଅନ୍ୟପଟେ ଫୋନ ଟ୍ୟାପିଂକୁ ନେଇ ସମ୍ବିତ କଂଗ୍ରେସକୁ ଦୋଷ ଦେଇଛନ୍ତି । କଂଗ୍ରେସର ଇତିହାସରେ ଫୋନ ଟ୍ୟାପିଂ ରହିଛି । କଂଗ୍ରେସ ସରକାର ସେଠାରେ କ୍ଷମତା ଯୁଦ୍ଧ କରୁଛନ୍ତି । ଅଡିଓ ଟେପର ଏଫଆଇଆରରେ ତଥାକଥିତ ଶବ୍ଦ ଲେଖାଯାଇଛି । ତେବେ ଏସବୁକୁ ଦୃଷ୍ଟିରେ ରଖି ମାମଲାର ସିବିଆଇ ତଦନ୍ତ କରାଯାଉ ବୋଲି ସେ ଦାବି କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
