ନୂଆଦିଲ୍ଲୀ: ସାଧାରଣ ନିର୍ବାଚନକୁ ଦୃଷ୍ଟିରେ ବିଜେପି ଜାରି କରିଛି ପଞ୍ଚମ ପ୍ରାର୍ଥୀ ତାଲିକା । ଏହି ତାଲିକାରେ ରହିଛି ୯ ଜଣ ପ୍ରାର୍ଥୀଙ୍କ ନାଁ । ଏହା ପୂର୍ବରୁ ବିଜେପି ଶନିବାର ଜାରି କରିଥିଲା ନିଜର ଚତୁର୍ଥ ପ୍ରାର୍ଥୀ ତାଲିକା । ଏଥିରେ ୧୧ ଜଣ ପ୍ରାର୍ଥୀଙ୍କ ନାଁ ରହିଥିଲା ।
ଏହି ତାଲିକା ଅନୁସାରେ, ଛତିଶଗଡର ପୂର୍ବତନ ମୁଖ୍ୟମନ୍ତ୍ରୀ ରମଣ ସିଂଙ୍କ ପୁଅ ଅଭିଷେକ ସିଂଙ୍କ ଟିକେଟ କାଟିଛି ବିଜେପି । ସେ ବର୍ତ୍ତମାନ ରାଜନନ୍ଦଗାଁଓରୁ ସାଂସଦ ଅଛନ୍ତି । ତାଙ୍କ ସ୍ଥାନରେ ଦଳ ସନ୍ତୋଷ ପାଣ୍ଡେଙ୍କୁ ଟିକେଟ ଦେଇଛି । ସେହିପରି ରାୟପୁର ସାଂସଦ ରମେଶ ବ୍ୟାସଙ୍କ ଟିକେଟ ମଧ୍ୟ କଟିଛି । ତାଙ୍କ ସ୍ଥାନରେ ସୁନୀଲ ସୋନୀଙ୍କୁ ଟିକେଟ ଦେଇଛି ଦଳ ।
ବିଗତ ଦିନରୁ ବିଜେପି ସ୍ପଷ୍ଟ କରିଥିଲା ଯେ ଛତିଶଗଡର ବର୍ତ୍ତମାନର ସମସ୍ତ ସାଂସଦଙ୍କ ଟିକେଟ କଟାଯିବ । ନିକଟ ଅତୀତରେ ରାଜ୍ୟର ବିଧାନସଭା ନିର୍ବାଚନରେ ଦଳକୁ ଶୋଚନୀୟ ପରାଜୟର ସାମ୍ନା କରିବାକୁ ପଡିଥିଲା ।ଦଳର ପଞ୍ଚମ ପ୍ରାର୍ଥୀ ତାଲିକାରେ ଛତିଶଗଡର ୬, ମହାରାଷ୍ଟ୍ରରୁ ଜଣେ ଓ ମେଘାଳୟରୁ ଜଣେ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି ।
