ପାଟନା: ବିହାର ନିର୍ବାଚନକୁ ମାତ୍ର ଅଳ୍ପ କେଇଟା ଦିନ ବାକି ରହିଛି । ହେଲେ ଏଯାଏଁ କୌଣସି ମେଣ୍ଟ ଦଳରେ ଆସନ ବଣ୍ଟନକୁ ନେଇ ଛିଡି ପାରୁନି ଅଙ୍କକଷା । ଏପରିସ୍ଥିତିରେ ଭାରତୀୟ ଜନତା ପାର୍ଟି ମୁଖ୍ୟାଳୟରେ ଜାରି ରହିଛି ଜାତୀୟ ନିର୍ବାଚନ କମିଟି ବୈଠକ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ଅଧ୍ୟକ୍ଷତାରେ ଏହି ବୈଠକ ବସିଛି । ବୈଠକରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ, ଶାହନାୱାଜ ହୁସେନ, ଭୁପେନ୍ଦ୍ର ଯାଦବଙ୍କ ସମେତ ଅନେକ ବରିଷ୍ଠ ବିଜେପି ନେତା ଉପସ୍ଥିତ ଅଛନ୍ତି । ବୈଠକରେ ଟିକଟ ବଣ୍ଟନକୁ ନେଇ ଆଲୋଚନା ହେଉଥିବା ଅନୁମାନ କରାଯାଉଛି ।
ଅନ୍ୟପକ୍ଷେ ବିହାର ନିର୍ବାଚନ ପୂର୍ବରୁ ଏନଡିଏରେ ଦେଖାଦେଇଛି ଫାଟ । ସହଯୋଗୀ ଦଳ ଏଲଜେପିର ମୁଖ୍ୟ ଚିରାଗ ପାସୱାନ ଜେଡିୟୁ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନିତିଶ କୁମାରଙ୍କ ନେତୃତ୍ବରେ ନିର୍ବାଚନ ଲଢିବେ ନାହିଁ ବୋଲି ସଫାସଫା ମନା କରିଦେଇଛନ୍ତି ।
