ପାଟନା: ବିହାରରେ ଆଗାମୀ ବିଧାନସଭା ନିର୍ବାଚନକୁ ନେଇ ଆରମ୍ଭ ହେବାକୁ ଯାଇଛି ଦଳ ଡିଆଁ ପର୍ବ । ଖୁବଶୀଘ୍ର ରାଜ୍ୟ ରାଜନୀତିରେ ଦେଖିବାକୁ ମିଳିବ ବଡ ପଟ ପରିବର୍ତ୍ତନ । ଯାହାକୁ ନେଇ ଏବେ ରାଜ୍ୟ ରାଜନୀତି ସରଗରମ । ସୂତ୍ର ଅନୁସାରେ ବିହାର ସରକାରରେ ମନ୍ତ୍ରୀ ଥିବା ଶ୍ୟାମ ରଜକ ଆସନ୍ତା 2 ଦିନ ମଧ୍ୟରେ ଦଳରୁ ଇସ୍ତଫା ଦେଇ ଆରଜେଡିରେ ସାମିଲ ହେବେ ।
ପୂର୍ବରୁ ମଧ୍ୟ ଶ୍ୟାମ ରଜକ ଆରଜେଡିରେ ମିଶିବେ ବୋଲି ଚର୍ଚ୍ଚା ହେଉଥିଲା । କିନ୍ତୁ ସେ ଏହାକୁ ଗଣମାଧ୍ଯମର ପ୍ରଚାର ବୋଲି ସଫେଇ ଦେଉଥିଲେ । କିନ୍ତୁ ଆସନ୍ତା 2 ଦିନ ମଧ୍ୟର ଦଳ ଛାଡିବା ନିଶ୍ଚିତ କୁହାଯାଉଛି । ଯଦି ଏହା ହୁଏ ତେବେ ନିର୍ବାଚନ ତାରିଖ ଘୋଷଣା ହେବାପୂର୍ବରୁ ରାଜ୍ୟରେ ପ୍ରଥମ ଥର ଜେଡିୟୁକୁ ଝଟକା ଲାଗିବ । ସମୟ ଥିଲା ଦିନେ ଶ୍ୟାମ ରଜକ ଆରଜେଡି ସୁପ୍ରିମ ଲାଲୁ ପ୍ରସାଦ ଯାଦବଙ୍କ ଅତି ଘନିଷ୍ଠ ଥିଲେ । ରାବ୍ରୀ ଦେବୀଙ୍କ ସରକାରରେ ମନ୍ତ୍ରୀ ଥିଲେ । ତେବେ ଜେଡିୟୁରେ ତାଙ୍କର ଅଣଦେଖାକୁ ସେ ଅନୁଭବ କରି ପୁଣି ଥରେ ନିଜ ପୁରୁଣା ଦଳକୁ ଫେରିଯିବା ପାଇଁ ମନ ବଳାଇଛନ୍ତି ଶ୍ୟାମ । ଜେଡିୟୁ ମଧ୍ୟ ତାଙ୍କୁ ବୁଝାଇବା ପାଇଁ ପ୍ରସ୍ତୁତ ନଥିବା କୁହାଯାଉଛି ।
ଶ୍ୟାମ ରଜକ 2009 ରେ ରାଷ୍ଟ୍ରୀୟ ଜନତା ଦଳ ( ଆରଜେଡି) ରୁ ଇସ୍ତଫା ଦେଇ ଜେଡିୟୁରେ ସାମିଲ ହୋଇଥିଲେ । ଜେଡିୟୁ ଟିକେଟରେ ନିର୍ବାଚନ ଲଢି ବିଜୟୀ ହୋଇ ମନ୍ତ୍ରୀ ହୋଇଥିଲେ । ବର୍ତ୍ତମାନ ବିହାରରେ ଜଣେ ଦଳିତ ନେତା ଭାବେ ରଜକଙ୍କ ବେଶ ପରିଚିତ । ଯଦି ରଜକ ଦଳ ଛାଡନ୍ତି ଓ ବିହାର ନିର୍ବାଚନରେ ଜାତିଗତ ରାଜନୀତି ହୁଏ ଜେଡିୟୁ ନିଶ୍ଚିତ ଝଟକା ଖାଇବାର ଆଶଙ୍କା ରହିଛି । ତେବେ ଆଗକୁ ରାଜ୍ୟ ରାଜନୀତିରେ ଏହାର ପ୍ରଭାବ କଣ ରହୁଛି ତା ଉପରେ ନଜର ।
ବ୍ଯୁରୋ ରିପୋର୍ଟ, ଇଟିଭି ଭାରତ
