ପାଟନା: ବିହାର ବିଧାନସଭା ନିର୍ବାଚନରେ ଏନଡିଏର ବିଜୟ ସହ ମୁଖ୍ୟମନ୍ତ୍ରୀ ନୀତିଶଙ୍କ ଶପଥ ଗ୍ରହଣ ମଧ୍ୟ ସରିଛି । ବିଜୟୀ ଦଳ ସରକାର ଗଢିଛି । ଏନଡିଏ ମେଣ୍ଟ ଅଂଶୀଦାର ଜେଡି-ୟୁ ମୁଖ୍ୟ ନୀତିଶ କୁମାର ସୋମବାର ସପ୍ତମ ଥର ପାଇଁ ବିହାରର ଶାସନ ଗାଦି ହାତେଇଛନ୍ତି । ଏହାସହ ବିଜେପିର ତାରକିଶୋର ପ୍ରସାଦ ଏବଂ ରେଣୁ ଦେବୀ ଉପ-ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଛନ୍ତି ।
ଏହାସହ ସୋମବାର ନୀତିଶ ନିଜର ୧୪ ଜଣିଆ ମନ୍ତ୍ରିମଣ୍ଡଳ ମଧ୍ୟ ଶପଥ ଗ୍ରହଣ କରିଛି । କିନ୍ତୁ ଦାୟିତ୍ବ ବଣ୍ଟନ ହୋଇନଥିବାବେଳେ ମଙ୍ଗଳବାର ସମସ୍ତ ମନ୍ତ୍ରୀଙ୍କୁ ବିଭାଗ ବଣ୍ଟନ କରିଛନ୍ତି ମୁଖ୍ୟମନ୍ତ୍ରୀ ନୀତିଶ କୁମାର । ମୁଖ୍ୟମନ୍ତ୍ରୀ ନୀତିଶ କୁମାର ନିଜେ ଗୃହ, ସାଧାରଣ ପ୍ରଶାସନ, କ୍ୟାବିନେଟ୍, ଭିଜିଲାନ୍ସ, ନିର୍ବାଚନ ଭଳି ବିଭାଗକୁ ନିଜ ପାଖରେ ରଖିଛନ୍ତି ।
ସେହିପରି ଉପ-ମୁଖ୍ୟମନ୍ତ୍ରୀ ତାରକିଶୋର ପ୍ରସାଦ ସିଂଙ୍କୁ ଅର୍ଥ, ବାଣିଜ୍ୟିକ କର, ପରିବେଶ ଏବଂ ଜଙ୍ଗଲ, ସୂଚନା ପ୍ରଯୁକ୍ତିବିଦ୍ୟା, ବିପର୍ଯ୍ୟାୟ ପରିଚାଳନା, ସହରୀ ବିକାଶ ଭଳି ବିଭାଗ ମିଳିଛି ଏବଂ ଅନ୍ୟ ଜଣେ ଉପ-ମୁଖ୍ୟମନ୍ତ୍ରୀ ରେଣୁ ଦେବୀଙ୍କୁ ମଧ୍ୟ ପଞ୍ଚାୟତିରାଜ, ପଛୁଆ ଜାତିର ଉନ୍ନତି ଏବଂ ଇବିସି କଲ୍ୟାଣ, ଶିଳ୍ପ ଭଳି ବିଭାଗ ପ୍ରଦାନ କରାଯାଇଛି ।
ଅନ୍ୟପକ୍ଷରେ ବିଜୟ ଚୌଧୁରୀ - ଗ୍ରାମୀଣ ଇଞ୍ଜିନିୟରିଂ, ଗ୍ରାମ୍ୟ ଉନ୍ନୟନ, ଜଳ ସମ୍ପଦ, ସୂଚନା ଏବଂ ପ୍ରସାରଣ, ସଂସଦୀୟ କାର୍ଯ୍ୟ । ବିଜେନ୍ଦ୍ର ଯାଦବ -ଶକ୍ତି, ଯୋଜନା, ଖାଦ୍ୟ ଏବଂ ଉପଭୋକ୍ତା ବ୍ୟାପାର । ମେୱା ଲାଲ ଚୌଧୁରୀ - ଶିକ୍ଷା।, ଶିଲା କୁମାରୀ - ପରିବହନ, ସନ୍ତୋଷ ମାଞ୍ଜୀ - କ୍ଷୁଦ୍ର ଜଳସେଚନ, ଅନୁସୂଚିତ ଜାତି / ଅନୁସୂଚିତ ଜନଜାତି କଲ୍ୟାଣ ବିଭାଗ ମିଳିଛି ।
ଏନଡିଏ ସରକାରରେ ଯୋଡିହୋଇଥିବା ବିକାଶଶୀଳ ଇନସାନ ପାର୍ଟି ପ୍ରମୁଖ ମୁକେଶ ସହନୀଙ୍କୁ ପଶୁପାଳନ ଏବଂ ମତ୍ସ୍ୟଚାଷ ବିଭାଗ ମିଳିଛି । ମଙ୍ଗଲ ପାଣ୍ଡେ- ସ୍ବାସ୍ଥ୍ୟ, ସଡକ ଏବଂ କଳା ଓ ସଂସ୍କୃତି, ଅମରେନ୍ଦ୍ର ସିଂ- କୃଷି, ସମବାୟ ସମିତି, ରାମପ୍ରୀତ୍ ସିଂ -ଜନସ୍ବାସ୍ଥ୍ୟ ବିଭାଗ, ଜୀବେଶ କୁମାର- ପର୍ଯ୍ୟଟନ, ଶ୍ରମ ଓ ଖଣି ବିଭାଗ ମିଳିଥିବା ବେଳେ ରାମ ସୂରତଙ୍କୁ ରାଜସ୍ବ ଓ ଆଇନ ଭଲି ବିଭାଗ ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
