ଇନ୍ଦୋର: ମଧ୍ୟପ୍ରଦେଶର ଜଣାଶୁଣା ଅଭିନେତ୍ରୀଙ୍କୁ ଛାଡ଼ପତ୍ର ପଠାଇଲେ ସ୍ବାମୀ । ଏହି ଘଟଣା ଏବେ ରାଜ୍ୟରେ ବେଶ ଚର୍ଚ୍ଚାର ବିଷୟ ପାଲଟିଛି । ଅଭିନେତ୍ରୀ ଅଲୀନା ଶେଖଙ୍କୁ ତାଙ୍କ ସ୍ବାମୀ 100ଟଙ୍କିଆ ଷ୍ଟାମ୍ପ ପେପରରେ ଛାଡ଼ପତ୍ର ପଠାଇଥିଲେ । ତେବେ ଅଲୀନା ଏହାକୁ ଅସ୍ବୀକାର କରିଦେଇଛନ୍ତି ।
ମିଳିଥିବା ସୂଚନା ମୁତାବକ ଭୋଜପୁରୀ ଅଭିନେତ୍ରୀ ଅଲୀନାଙ୍କ ନିକଟକୁ ତାଙ୍କ ସ୍ବାମୀ 100 ଟଙ୍କିଆ ଷ୍ଟାମ୍ପ ପେପରରେ ଛାଡ଼ପତ୍ର ପଠାଇଥିଲେ । ଛାଡ଼ପତ୍ରରେ ଲେଖି ପଠାଇଥିଲେ କି, 'ମୁଁ ଦୁଇ ଜଣଙ୍କୁ ସାକ୍ଷୀ ରଖି ତୁମକୁ ଛାଡ଼ପତ୍ର ଦେଉଛି' । ମାତ୍ର ଏହାକୁ ଅଲୀନା ଅସ୍ବୀକାର କରିଦେଇଥିଲେ ।
ତେବେ ଅଲୀନାଙ୍କ ସ୍ବାମୀ ପୂର୍ବରୁ ଦୁଇଥର ଛାଡ଼ପତ୍ର ଦେବାକୁ ପ୍ରୟାସ କରିସାରିଛି । ତେବେ ବର୍ତ୍ତମାନ ତିନି ତଲାକ ବିଲ ଦେଶରେ ବେଶ ଚର୍ଚ୍ଚାର ବିଷୟ ପାଲଟି ଥିବାରୁ ଏହାକୁ ମୁଁ ମାନୁ ନାହିଁ ବୋଲି ଅଲୀନା କହିଛନ୍ତି ।
ସେପଟେ ଆଜି ମୋଦି ସରକାର ଐତିହାସିକ ସଫଳତା ହାତେଇଛନ୍ତି । ଉଭୟ ଲୋକସଭା ଓ ରାଜ୍ୟସଭାରେ ଦୀର୍ଘଦିନରୁ ପଡ଼ିରହିଥିବା ତିନି ତଲାକ ବିଲ ପାସ ହୋଇ ସାରିଛି । କେବଳ ରାଷ୍ଟ୍ରପତିଙ୍କ ମୋହରକୁ ଅପେକ୍ଷା । ରାଷ୍ଟ୍ରପତିଙ୍କ ମୋହର ପରେ ଏହା ଆଇନରେ ପରିଣତ ହୋଇଯିବ । ତେବେ ମୋଦିଙ୍କ ଏହି ସଫଳତାକୁ ଅଲୀନା ସମର୍ଥନ ଜଣାଇଛନ୍ତି ।