ମୁମ୍ବାଇ: ସାରାବିଶ୍ବରେ ଏବେ କୋରୋନା ଆକ୍ରାନ୍ତଙ୍କ ସଂଖ୍ୟା ଦ୍ରୁତ ଗତିରେ ବଢିବାରେ ଲାଗିଛି । ହେଲେ ଦଃଖର ବିଷୟ, ଦିନ ରାତି ଖରା ବର୍ଷା ସହି ଆମକୁ ସଚେତନ କରୁଥିବା ପୋଲିସ କର୍ମଚାରୀ ବି ଏଥିରୁ ବାଦ ପଡିନାହାନ୍ତି । ଆଉ ଭାରତର ସବୁଠାରୁ ଅଧିକ ସଂକ୍ରମିତ ରାଜ୍ୟ ମହାରାଷ୍ଟ୍ରରେ ଦିନକୁ ଦିନ ପୋଲିସ କର୍ମୀ ପଜିଟିଭ୍ ଚିହ୍ନଟ ହେଉଛନ୍ତି ।
ଗୁରୁବାର ଜଣେ ମହାରାଷ୍ଟ୍ର ପୋଲିସର କର୍ମଚାରୀ କୋରୋନାରେ ଆକ୍ରାନ୍ତ ହୋଇଥିବା ବେଳେ ଅନ୍ୟ ଜଣେ ଗତ 24 ଘଣ୍ଟା ତଳେ ଚିହ୍ନଟ ହୋଇଥିଲେ । ଏବେ ମହାରାଷ୍ଟ୍ରରେ 2557 ପୋଲିସ କର୍ମଚାରୀ କୋରୋନାରେ ଆକ୍ରାନ୍ତ ହୋଇଥିବା ବେଳେ ମୃତ୍ୟୁ ସଂଖ୍ୟା 30ରେ ପହଞ୍ଚିଲାଣି ।
କୋରୋନାରେ ମୃତ 30 ପୋଲିସ କର୍ମଚାରୀଙ୍କ ମଧ୍ୟରୁ 18 ଜଣ ମୁମ୍ବାଇ ପୋଲିସ ଅଧିକାରୀ ଅଟନ୍ତି, ଯେଉଁମାନେ ମୁମ୍ବାଇରେ ଲକଡାଉନ ସମୟରେ କାର୍ଯ୍ୟରତ ଥିବା ବେଳେ ଏହି ମହମାରୀର ଶିକାର ହୋଇଥିଲା । ବର୍ତ୍ତମାନ 191 ଅଧିକାରୀଙ୍କ ସମେତ ପୋଲିସ୍ ଫୋର୍ସରେ ସକ୍ରିୟ ଥିବା କୋରୋନା ଆକ୍ରାନ୍ତଙ୍କ ସଂଖ୍ୟା 1510 ବୋଲି ମହାରାଷ୍ଟ୍ର ପୋଲିସ ସୂଚନା ଦେଇଛନ୍ତି ।
ଦେଶରେ କରୋନା ସଂକ୍ରମଣକୁ ରୋକିବା ପାଇଁ ଲାଗୁ ହୋଇଥିବା ଦେଶବ୍ୟାପୀ ଲକଡାନ ସମୟରେ ମହାରାଷ୍ଟ୍ର ପୋଲିସ୍ କର୍ମଚାରୀଙ୍କ ଉପରେ 258 ଥର ଆକ୍ରମଣ ହୋଇଛି । ଆଉ ଏହି ଆକ୍ରମଣରେ ପାଖାପାଖି 86 ପୋଲିସ୍ ଆହତ ମଧ୍ୟ ହୋଇଥିଲେ । ମହାରାଷ୍ଟ୍ର ପୋଲିସ ଭାରତୀୟ ଦଣ୍ଡ ବିଧାନ ଧାରା 188 ଅନୁଯାୟୀ ଲକଡାଉନ୍ ଆଦେଶ ଉଲ୍ଲଂଘନ କରିଥିବା 28,820 ଜଣ ଲୋକଙ୍କୁ ଗିରଫ କରିଥିଲା।
