ବେଙ୍ଗାଲୁରୁ: ଦେଶରେ ଅନ୍ୟତମ ମେଟ୍ରୋ ସିଟି ତଥା ଆଇଟି ହବ ସ୍ଥାନ ଭାବେ ପରିଚିତ ସହର ବେଙ୍ଗାଲୁରୁରେ ବଢିବାରେ ଲାଗିଛି ସାଇବର କ୍ରାଇମର ମାତ୍ରା । ଏହି ମାତ୍ରା ଏତେମାତ୍ରାରେ ବଢିଛି ଯେ ବେଙ୍ଗାଲୁରୁ ଦେଶର ନଂ 1 ସାଇବର କ୍ରାଇମ ସହରରେ ପରିଣତ ହେବାକୁ ଯାଉଛି । ଯାହାର କାରଣ ସାଜିଛି ସାଇବର କ୍ରାଇମ ସେଲ୍ରେ ସ୍ପେଶାଲିଷ୍ଟଙ୍କ ଅଭାବ ।
ସୂଚନା ମୁତାବକ ବର୍ତ୍ତମାନ ସହରରେ ଥିବା ସେଣ୍ଟ୍ରାଲ କ୍ରାଇମ ବ୍ରାଞ୍ଚରେ କେବଳ 25 ଜଣ ସାଇବର କ୍ରାଇମ ସ୍ପେଶାଲିଷ୍ଟ ଷ୍ଟାଫ ରହିଛନ୍ତି । ତେଣେ ବର୍ତ୍ତମାନ ସୁଦ୍ଧା ସହରରେ ସାଇବର କ୍ରାଇମକୁ ନେଇ 9000ଟି ମାମଲା ରୁଜୁ ହୋଇସାରିଛି । ଅଳ୍ପ ସଂଖ୍ୟକ ଷ୍ଟାଫ ସହିତ ମାତ୍ରାଧିକ ଅଭିଯୋଗ ଯୋଗୁଁ ଅନେକ ମାମଲାର ସମାଧାନ ହୋଇପାରୁନଥିବା ମଧ୍ୟ ଅଭିଯୋଗ ହୋଇଛି ।
ତେଣୁ ଷ୍ଟାଫ ସଂଖ୍ୟା ବୃଦ୍ଧି କରିବା ପାଇଁ ନିକଟରେ ବେଙ୍ଗାଲୁରୁ ସିଆଇଡିର ବରିଷ୍ଠ ଅଧିକାରୀମାନେ ଡିଜି, ଆଇଜିପି ଓ ସିଟି ପୋଲିସକୁ ଏକ ଚିଠି ଲେଖିଥିଲେ । ହେଲେ ଚିଠିର କୌଣସି ଉତ୍ତର ନମିଳିବା ସହ ଅନ୍ୟପଟେ ବଢିବାରେ ଲାଗିଛି ସାଇବର କ୍ରାଇମର ମାତ୍ରା । ପ୍ରାୟ ପ୍ରତିଦିନ ଅନଲାଇନ ଠକେଇ, ଓଟିପି ଠକେଇ ଓ ସୋସିଆଲ ମିଡିଆରେ ଅସଦାଚରଣ ଭଳି ସାଇବର କ୍ରାଇମର ଅଭିଯୋଗ ନେଇ ମାମଲା ରୁଜୁ ହେବାରେ ଲାଗିଛି ।
ଯଦି ଏହିପରି ମାତ୍ରାରେ ସହରରେ ସାଇବର କ୍ରାଇମର ମାତ୍ରା ବଢିବାରେ ଲାଗେ ଓ ସମୟ ମଧ୍ୟରେ ଏହାର ସମାଧାନ ନହୁଏ ତେବେ ଖୁବଶୀଘ୍ର ବେଙ୍ଗାଲୁରୁ ଦେଶର ନଂ 1 ସାଇବର କ୍ରାଇମ ସହର ଭାବେ ପରିଚିତ ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
