ମୁମ୍ବାଇ: ଜଣେ ଗର୍ଭବତୀ ମହିଳାର ସାଦଖିଆ କଥା ଆପଣ ଶୁଣିଥିବେ । କିନ୍ତୁ କେବେ କେଉଁ ଗଛର ସାଦଖିଆ କଥା ଶୁଣିଛନ୍ତି କି ? କାନକୁ ଟିକିଏ ଅଡୁଆ ଲାଗୁଥିଲେ ବି ଏହା ସତ । ନଡିଆ ଗଛର ସାଦଖିଆ । ତାହା ପୁଣି ପୁରା ପାରମ୍ପରିକ ଭାବରେ । ଶାଢୀ, ଚୁଡି, ସିନ୍ଦୁର, ଲଗାଇ ନୂଆ ବୋହୁ ପରି ସଜାଇ ରୀତିନୀତିରେ ପାଳନ ହୋଇଛି ନଡିଆ ଗଛର ସାଦଖିଆ । କାରଣ ମହାରାଷ୍ଟ୍ରର ଏହି ନଡିଆ ଗଛରେ ପ୍ରଥମ ଥର ପାଇଁ ଫଳ ଧରିଛି ।
ପୁନେ କାରଭେନଗର ଅଞ୍ଚଳର ନିତି ଯାଦବ ନିଜ ବଗିଚାରେ ଅନେକ ଗଛ ରୋପଣ କରିଛନ୍ତି । ଗଛକୁ ଭଲ ପାଉଥିବା ମଣିଷଟିଏ କହିଲେ ଅତ୍ୟୁକ୍ତି ହେବ ନାହିଁ । କିଛି ବର୍ଷ ପୂର୍ବରୁ ସେ ନିଜ ବଗିଚାରେ ଏକ ନଡିଆ ଗଛ ଲଗାଇଥିଲେ । ଖୁବ ଯତ୍ନ୍ ମଧ୍ୟ ନେଉଥିଲେ । ଆଉ ପ୍ରଥମ ଥର ନଡିଆ ଗଛରେ ଫଳ ଧରିବା ପରେ ଖୁବ ଧୁମ୍ଧାମ୍ ରେ ସାଦଖିଆ ଉତ୍ସବ ପାଳନ କରିଛନ୍ତି ।
ଯେପରି କୌଣସି ମହିଳା ଗର୍ଭବତୀ ହେଲେ ସମସ୍ତ ରୀତିନିତିରେ ସାଦଖିଆ ଉତ୍ସବ ପାଳନ ହୋଇଥାଏ । ଠିକ ସେହିପରି ସାହିର କିଛି ମହିଳାମାନେ ମିଶି ନଡିଆ ଗଛରେ ମୁହଁ ଆଙ୍କି, ଶାଢୀ ପିନ୍ଧାଇ, ମଙ୍ଗଳସୂତ୍ର ଆଦି ଲଗାଇ ଫଳମୂଳ, ଭୋଗ ଲଗାଇ ପୂଜାର୍ଚ୍ଚନା କରିଛନ୍ତି । ଏହାସହ ମହିଳାମାନେ ଗୀତ ଗାଇ ଅଭିନନ୍ଦନ ମଧ୍ୟ ଜଣାଉଥିବା ଦେଖିବାକୁ ମିଳିଛି ।
ସରକାରଙ୍କ ତରଫରୁ ଚାରା ରୋପଣ କରିବା ସହ ଏହାର ରକ୍ଷଣାବେକ୍ଷଣ କରିବାକୁ ବିଭିନ୍ନ ଯୋଜନାମାନ କରାଯାଉଛି । କିନ୍ତୁ ତାହା କିଛିଟା କ୍ଷେତ୍ର କାର୍ଯ୍ୟରେ ହେଉଛି । ହେଲେ ପୁନେର ନିତି ଯାଦବ ରକ୍ଷଣାବେକ୍ଷଣ ସହ ଗଛର ସାଦଖିଆ କରି ଲୋକଙ୍କ ପାଇଁ ସୃଷ୍ଟି କରିଛନ୍ତି ଏକ ଅନନ୍ୟ ଉଦାହରଣ ।
