ବେଙ୍ଗାଲୁରୁ: ବିବାହ ଉତ୍ସବରୁ ଫେରିବା ସମୟରେ ରାସ୍ତାରେ ହମ୍ପ୍ସ ନିକଟରେ ବ୍ରେକ ଲଗାଇବା ସମୟରେ ପଛରେ ବସିଥିବା ମା' କୋଳରୁ ଖସିଯାଇ ଶିଶୁଟି ମୃତ୍ୟୁବରଣ କରିଛି । ଏହି ଦୁଃଖଦ ଘଟଣା କର୍ଣ୍ଣାଟକର କିରଙ୍ଗନ୍ଦୁର ଗ୍ରାମ ନିକଟରେ ଶୁକ୍ରବାର ଘଟିଛି ।
ଚାନ୍ଦଗଲୁ ଗ୍ରାମର ଅଧିବାସୀ ରଞ୍ଜିତା ନିଜ ଅଢେଇ ବର୍ଷର ଶିଶୁ ଓ ବଡ ଭଉଣୀ ମଧୁମତିଙ୍କ ସହିତ ଏକ ସ୍କୁଟିରେ ବିବାହ ଉତ୍ସବକୁ ଯାଇଥିଲେ । ମଧୁମତି ଗାଡି ଚଳାଉଥିବା ବେଳେ ରଞ୍ଜିତା ନିଜ ଶିଶୁକୁ କୋଳରେ ଧରି ପଛରେ ବସିଥିଲେ । ତେବେ ଫେରିବା ସମୟରେ ରାସ୍ତାରେ ଏକ ହମ୍ପ୍ସ ଆସିବାରୁ ମଧୁମତି ବ୍ରେକ ଲଗାଇବା ସମୟରେ ଭାରସାମ୍ୟ ରକ୍ଷା କରି ନପାରିବାରୁ ସ୍କୁଟିଟି ରାସ୍ତାରେ ପଡିଯାଇଥିଲା । ଯାହାଫଳରେ ଶିଶୁଟି ରଞ୍ଜିତାଙ୍କ ହାତରୁ ଖସି ପଡିଥିଲା ।
ଦୁର୍ଘଟଣାରେ ଶିଶୁର ମୁଣ୍ଡରେ ଓ ଶରୀରର ଅନ୍ୟ ସ୍ଥାନରେ ଗଭୀର ଆଘାତ ଲାଗିଛି। ତେବେ ଆଘାତପ୍ରାପ୍ତ ଶିଶୁକୁ ମାଣ୍ଡ୍ୟା ଇନଷ୍ଟିଚ୍ୟୁଟ ଅଫ୍ ମେଡିକାଲ ସାଇନ୍ସ ହସ୍ପିଟାଲକୁ ନିଆଯାଇଥିଲା । କିନ୍ତୁ ସେଠାରେ ଶିଶୁଟିର ମୃତ୍ୟୁ ଘଟିଥିବା ବେଳେ ମୃତ ଶିଶୁର ମା' ରଞ୍ଜିତା ଓ ମାଉସୀ ମଧୁମତି ଚିକିତ୍ସିତ ହେଉଛନ୍ତି । ହମ୍ପ୍ସଟି ସାଧାରଣଠାରୁ ଟିକେ ଅଧିକ ଉଚ୍ଚବିଶିଷ୍ଟ । ଦୂରରୁ ଏହା ଗାଡିଚାଳକକୁ ସଠିକ୍ ଭାବେ ଦୃଷ୍ଟିଗୋଚର ହୋଇନଥାଏ, ଏଥିଲାଗି ଏହି ଦୁର୍ଘଟଣାଟି ଘଟିଥିବା ପ୍ରତ୍ୟକ୍ଷଦର୍ଶୀମାନେ ପୋଲିସକୁ ସୂଚନା ଦେଇଛନ୍ତି ।
