ନୂଆଦିଲ୍ଲୀ: ମାଲବାର ନୌ-ସମରାଭ୍ୟାସରେ ଭାରତ-ଜାପାନ-ଆମେରିକା ସହ ସାମିଲ ହେବ ଅଷ୍ଟ୍ରେଲିଆ । ପୂର୍ବ ଲଦାଖରେ ଚୀନ ସହିତ ଜାରି ଉତ୍ତେଜନା ମଧ୍ୟରେ କେନ୍ଦ୍ର ସରକାର ଆଗାମୀ ମାସରେ ହେବାକୁ ଥିବା ବାର୍ଷିକ ମାଲବାର ନୌସମରାଭ୍ୟାସ ପାଇଁ ଅଷ୍ଟ୍ରେଲିଆକୁ ଆମନ୍ତ୍ରିତ କରିଛନ୍ତି ବୋଲି ସୋମବାର ଘୋଷଣା କରିଛନ୍ତି । ଭାରତର ଏହି ପଦକ୍ଷେପ ଚୀନର ଚିନ୍ତା ବଢାଇ ଦେଇଛି । କାରଣ ପ୍ରଥମ ଥର କ୍ଵାର୍ଡର ସମସ୍ତ ସଦସ୍ୟ ଦେଶ ଏକ ସଙ୍ଗେ କୌଣସି ଏକ ସମରାଭ୍ୟାସରେ ସାମିଲ ହେବାକୁ ଯାଉଛନ୍ତି ।
ଏହି ସମରାଭ୍ୟାସ ଏମିତି ସମୟରେ ହେବାକୁ ଯାଉଛି ଯେବେ ଭାରତ ଓ ଚୀନ ମଧ୍ୟରେ ସୀମାରେ ଉତ୍ତେଜନା ଚରମରେ ରହିଛି । ସାମୁଦ୍ରିକ ସୁରକ୍ଷା କ୍ଷେତ୍ରରେ ଭାରତ ଅନ୍ୟ ଦେଶମାନଙ୍କ ସହ ସହଯୋଗ ବୃଦ୍ଧି କରିବାକୁ ଚାହୁଁଛି ଏବଂ ମାଲବାର -2020 ନୌସେନା ପରିଚାଳନାରେ ଅଷ୍ଟ୍ରେଲୀୟ ନୌସେନାର ଅଂଶଗ୍ରହଣ ପୃଷ୍ଠଭୂମିରେ ଅଷ୍ଟ୍ରେଲିଆ ସହ ପ୍ରତିରକ୍ଷା କ୍ଷେତ୍ରରେ ସହଯୋଗର ବୃଦ୍ଧି ଦେଖାଯିବ ବୋଲି ପ୍ରତିରକ୍ଷା ମନ୍ତ୍ରଣାଳୟ ଏକ ବିବୃତ୍ତିରେ କହିଛି । ମନ୍ତ୍ରଣାଳୟ କହିଛି ଯେ, ଏହି ଅଭ୍ୟାସ ଏଥିରେ ଅଂଶଗ୍ରହଣ କରୁଥିବା ସମସ୍ତ ଦେଶର ନୌସେନା ମଧ୍ୟରେ ସମନ୍ବୟକୁ ଆହୁରି ମଜବୁତ କରିବ ।
ମାଲବାର ଅଭ୍ୟାସ 1992 ମସିହାରେ ଆମେରିକା ଏବଂ ଭାରତୀୟ ନୌସେନା ମଧ୍ୟରେ ଭାରତ ମହାସାଗରରେ ଦ୍ବିପାକ୍ଷିକ ଅଭ୍ୟାସ ଆରମ୍ଭ ହୋଇଥିଲା । 2015 ମସିହାରେ ଜାପାନ ଏହି ବ୍ୟାୟାମର ସ୍ଥାୟୀ ଅଂଶଗ୍ରହଣକାରୀ ହେଲା । ତେବେ ଗତ କିଛି ବର୍ଷ ଧରି ଏହି ବ୍ୟାୟାମରେ ଭାଗ ନେବାକୁ ଅଷ୍ଟ୍ରେଲିଆ ଆଗ୍ରହ ଦେଖାଉଥିଲା ।
