ନୂଆଦିଲ୍ଲୀ: କୋରୋନା ଭାଇରସ ସଂକ୍ରମଣର ମୁକାବିଲା ପାଇଁ ସାରା ଦେଶକୁ 21 ଦିନ ପର୍ଯ୍ୟନ୍ତ ଲକଡାଉନ ଘୋଷଣା କରାଯାଇଛି । ଗୁରୁବାର ପ୍ରଧାନମନ୍ତ୍ରୀ ମୋଦି ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଲକଡାଉନ ସମ୍ପର୍କରେ ଭିଡିଓ କନଫରେନ୍ସିଂ ଜରିଆରେ ଆଲୋଚନା କରିଥିଲେ ।
ପ୍ରଧାନମନ୍ତ୍ରୀଙ୍କ ସହ ଆଲୋଚନା ପରେ ଅରୁଣାଚଳ ମୁଖ୍ୟମନ୍ତ୍ରୀ ପେମା ଖାଣ୍ଡୁ ଏକ ଟ୍ବଟ୍ କରିଥିଲେ । ଉକ୍ତ ପୋଷ୍ଟରେ ସେ ଏପ୍ରିଲ 15ରେ ଲକଡାଉନ ପ୍ରତ୍ୟାହାର ନେଇ ଉଲ୍ଲେଖ କରିଥିଲେ । ଏହା ସହ ସେ ଲେଖିଥିଲେ ଯେ, ଏପ୍ରିଲ 15ରେ ଲକଡାଉନ ସମ୍ପୂର୍ଣ୍ଣ ହେବ । କିନ୍ତୁ ଏହାର ମାନେ ନୁହେଁ ଯେ ଲୋକେ ପୂର୍ବ ଭଳି ରାସ୍ତାରେ ବୁଲିବେ । କୋରୋନା ଭାଇରସର ପ୍ରତିହତ ପାଇଁ ସମସ୍ତଙ୍କୁ ଏହାର ଦାୟିତ୍ବ ନିଜ ହାତକୁ ନେବାକୁ ପଡିବ । ଲକଡାଉନ ଏବଂ ସାମାଜିକ ଦୂରତ୍ବ ଏହା ଭୂତାଣୁକୁ ଶେଷ କରିବାର ଏକମାତ୍ର ଉପାୟ । କିନ୍ତୁ ପରେ ସେ ଉକ୍ତ ପୋଷ୍ଟକୁ ହଟାଇ ଏକ ସାଧାରଣ ପ୍ରତିକ୍ରିୟା ରଖିଥିଲେ ।
ଯେଉଁଥିରେ ସେ ଲେଖିଥିଲେ ଯେ, ଲକଡାଉନକୁ ନେଇ ପୋଷ୍ଟ କରାଯାଇଥିବା ପ୍ରଥମ ଟ୍ବିଟ ଜଣେ ଅଫିସର କରିଥିଲେ । ତାଙ୍କର ହିନ୍ଦୀ ଭାଷାରେ ଜ୍ଞାନ ଗୋଟିଏ ସୀମା ପର୍ଯ୍ୟନ୍ତ ରହିଛି । ଯେଉଁକାରଣରୁ ଉକ୍ତ ଟ୍ବିଟକୁ ହଟାଇ ଦିଆଗଲା ।
ସୂଚନାଯୋଗ୍ୟ, ଗୁରୁବାର ପ୍ରଧାନମନ୍ତ୍ରୀ ମୋଦି ଦେଶର ସମସ୍ତ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ ଭିଡିଓ କନଫରେନ୍ସିଂ ଜରିଆରେ ଆଲୋଚନା କରିଥିଲେ । ଏହି ଆଲୋଚନାରେ କୋରୋନା ଭାଇରସ ଏବଂ ବର୍ତ୍ତମାନର ସ୍ଥିତି ସମ୍ପର୍କରେ ଚର୍ଚ୍ଚା ହୋଇଥିଲା । ମୋଦି ଦ୍ବିତୀୟ ଥର ପାଇଁ ସବୁ ରାଜ୍ୟର ମୁଖ୍ୟମନ୍ତ୍ରୀଙ୍କ ସହ କୋରୋନା ଭାଇରସ ଉପରେ ଆଲୋଚନା କରିଛନ୍ତି ।
