ଶ୍ରୀନଗର: ଜମ୍ମୁ-କାଶ୍ମୀରରେ ସୁରକ୍ଷାକର୍ମୀଙ୍କୁ ବଡ ସଫଳତା ମିଳିଛି । ପୋଲିସ ଏବଂ ସେନାର 38 ରାଷ୍ଟ୍ରୀୟ ରାଇଫଲ୍ସର ମିଳିତ ଅଭିଯାନରେ ଏକ ଆତଙ୍କବାଦୀ ଶିବିରରେ ଚଢାଉ କରିଛନ୍ତି । ରଜୌରୀରର ଥାନାମଣ୍ଡି କ୍ଷେତ୍ରରେ ସୁରକ୍ଷାକର୍ମୀଙ୍କ ଦ୍ବାରା ସର୍ଚ୍ଚ ଅପରେସନ କରାଯାଇଥିଲା । ଏହି ସମୟରେ ସେମାନେ ଏକ ଆତଙ୍କବାଦୀ ଶିବିରରେ ଚଢାଉ କରିଥିଲେ । ତେବେ ଏହି ଶିବିରରେ ଏକ ପିକେ ରାଇଫଲ୍ସ, ଚାଇନିଜ ପିସ୍ତଲ, ଏକେ-47ର ଏକ ମାଗାଜିନ, ଅନ୍ୟ 2ଟି ମାଗାଜିନ, 2ଟି ୟୁବିଜିଏଲ ଗ୍ରେନେଡ ସମେତ ଅନେକ ଅସ୍ତ୍ରଶସ୍ତ୍ର ଏବଂ ଗୁଳିଗୋଳା ଜବତ ହୋଇଛି । ତେବେ ଆତଙ୍କବାଦୀମାନେ କୌଣସି ବଡ ଧରଣର ଆକ୍ରମଣ ଯୋଜନା କରୁଥିବା କୁହାଯାଉଛି ।
ସୂଚନା ମୁତାବକ, ଏହି ଅଞ୍ଚଳରେ ଆତଙ୍କବାଦୀ ଶିବିର ଥିବା ସେନାକୁ ବିଶେଷ ସୂତ୍ରରୁ ସୂଚନା ମିଳିଥିଲା । ସୂଚନା ଆଧାରରେ ପୋଲିସ ଏବଂ ସେନାର ମିଳିତ ଟିମ ଅଞ୍ଚଳରେ ଘେରାବନ୍ଦୀ କରି ସର୍ଚ୍ଚ ଅପରେସନ ଆରମ୍ଭ କରିଥିଲେ । ଏହି ସମୟରେ ଆତଙ୍କବାଦୀ ଶିବିର ଠାବ ହୋଇଥିଲା । ତେବେ ବର୍ତ୍ତମାନ ସୁଦ୍ଧା ସର୍ଚ୍ଚ ଅପରେଶନ ଜାରି ରହିଥିବା ଜଣାପଡିଛି ।
