ମୁମ୍ବାଇ: ମହାମାରୀ କୋରୋନାକୁ ନେଇ ସମସ୍ତେ ଭୟଭୀତ । କୋରୋନା ଭାଇରସକୁ ପ୍ରତିହତ କରିବା ପାଇଁ ସରକାର ଯଥାସମ୍ଭବ ଚେଷ୍ଟା ମଧ୍ୟ ଜାରି ରଖିଛନ୍ତି । ଯେଉଁକାରଣରୁ ସମଗ୍ର ଦେଶରେ ଲକଡାଉନର ଅବଧିକୁ ବୃଦ୍ଧି କରାଯାଇଛି । ମାତ୍ର ଏପରି ସମୟରେ ମହାରାଷ୍ଟ୍ରର ଏକ ବିଶାଳ ଜନସମାବେଶ ସରକାରଙ୍କ ଚିନ୍ତା ବଢାଇଛି ।
ତେବେ ମଙ୍ଗଳବାର ମହାରାଷ୍ଟ୍ରର ବାନ୍ଦ୍ରା ଷ୍ଟେସନରେ ଶ୍ରମିକମାନେ ଏକାଠି ହୋଇ ଭିଡ ଜମାଇଥିଲେ । ପ୍ରଧାନମନ୍ତ୍ରୀଙ୍କ ପୂର୍ବ ଉଦବୋଧନ ଅନୁସାରେ ମଙ୍ଗଳବାର ଅର୍ଥାତ 14 ଏପ୍ରିଲରେ ଲକଡାଉନର ଅବଧି ଶେଷ ହେବାର ଥିଲା । ମାତ୍ର ସ୍ଥିତିର ଭୟାବହତାକୁ ଦୃଷ୍ଟିରେ ରଖି ଏହାକୁ ବଢାଇ ଦିଆଯାଇଥିଲେ ମଧ୍ୟ ଶ୍ରମିକମାନେ ନିଜ ଘରକୁ ଫେରିବା ଆଶାରେ ଷ୍ଟେସନରେ ଭିଡ ଜମାଇଥିଲେ । ଆଉ ପୋଲିସର ଲାଠିଚାର୍ଜ ପରେ ସେମାନଙ୍କୁ ସେଠାରୁ ହଟାଯାଇଥିଲା ।
ତେବେ ଏନେଇ ଗୃହମନ୍ତ୍ରୀ ଅମିତ ଶାହା ମହାରାଷ୍ଟ୍ରର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ସହ ଆଲୋଚନା କରି ବାନ୍ଦ୍ରାର ଜନସମାବେଶକୁ ନେଇ ଉଦ୍ବେଗ ପ୍ରକାଶ କରିଛନ୍ତି । ଆଉ ଏଭଳି ଏକ ଘଟଣା ଭାରତରେ କୋରୋନା ଭାଇରସ ବିରୋଧରେ ଜାରିଥିବା ଲଢେଇକୁ ଦୁର୍ବଳ କରିଛି ବୋଲି ସେ କହିଛନ୍ତି । ସେହିପରି ଏଭଳି ଘଟଣାକୁ ଏଡାଇବା ପାଇଁ ସଜାଗ ରହିବା ଆବଶ୍ୟକ ବୋଲି ସେ ମତବ୍ୟକ୍ତ କରିଛନ୍ତି । ଏହାସହ ମହାରାଷ୍ଟ୍ର ସରକାରଙ୍କୁ ମଧ୍ୟ ସେ ତାଙ୍କର ସମ୍ପୂର୍ଣ୍ଣ ସମର୍ଥନ ପ୍ରଦାନ କରିଛନ୍ତି ।
ସୌଜନ୍ୟ@ANI
