ନୂଆଦିଲ୍ଲୀ: ମହାମାରୀ କୋରୋନା ସଙ୍କଟ ସମୟରେ ଦିଲ୍ଲୀସ୍ଥିତ ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସ(AIIMS)ର ନର୍ସ ସଂଘର ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ଧାରଣା । ଷଷ୍ଠ ବେତନ ଆୟୋଗର ପ୍ରସ୍ତାବକୁ ଗ୍ରହଣ କରିବାକୁ ଦାବି କରିଛି ନର୍ସ ସଂଘ ।
ନର୍ସ ସଂଘର ଏହି ଦାବି ନେଇ ଆନ୍ଦୋଳନକୁ ଦୁର୍ଭାଗ୍ୟପୂର୍ଣ୍ଣ ବୋଲି କହିଛନ୍ତି ଏମ୍ସ ନିର୍ଦେଶକ ଡାକ୍ତର ରଣଦୀପ ଗୁଲେରିଆ । ମହାମାରୀର ଏହି ସଂକଟ ସମୟରେ ପ୍ରକୃତ ନର୍ସ ଆନ୍ଦୋଳନ କରିପାରିବେ ନାହିଁ ବୋଲି ସେ କହିଛନ୍ତି । ଏହାସହ ନର୍ସ ସଂଘ ଅନିର୍ଦ୍ଧିଷ୍ଟକାଳ ପର୍ଯ୍ୟନ୍ତ ଆନ୍ଦୋଳନକୁ ନ ଯାଆନ୍ତୁ ବୋଲି ଗୁଲେରିଆ ଅପିଲ କରିଛନ୍ତି ।
ଏମ୍ସ ନିର୍ଦେଶକଙ୍କ କହିବା ଅନୁଯାୟୀ ନର୍ସ ସଂଘର 23ଟି ଦାବିକୁ ସରକାର ଓ ହସ୍ପିଟାଲ ପ୍ରଶାସନ ମାନି ସାରିଛନ୍ତି । ଏଥିରେ ସେମାନଙ୍କ ପ୍ରମୁଖ ଦାବି ଷଷ୍ଠ ବେତନ କମିସନର ସୁପାରିସ ଲାଗୁ କରିବା ସାମିଲ ରହିଛି ।
ସେପଟେ ନର୍ସ ସଂଘର କହିବା ଅନୁଯାୟୀ ଯେତେ ପର୍ଯ୍ୟନ୍ତ ସେମାନଙ୍କ ଦାବି ପୂରଣ ନହୋଇଛି ସେବେ ଯାଏଁ ଆନ୍ଦୋଳନ ଜାରି ରହିବ । ତେବେ ଏମ୍ସ ନିର୍ଦେଶକଙ୍କ ଏହି ଅପିଲ ନର୍ସ ସଂଘ ଉପରେ କୌଣସି ପ୍ରଭାବ ନ ପକାଇବା ପରି ମନେ ହେଉଛି । ଅନ୍ୟପକ୍ଷେ ନର୍ସ ସଂଘର ଅନିର୍ଦ୍ଧିଷ୍ଟ କାଳ ଆନ୍ଦୋଳନ ଏମ୍ସରେ ରୋଗୀଙ୍କ ଚିନ୍ତା ବଢିଯାଇଛି ।
