ୱାସିଂଟନ: ପୁଣି ନିଜ କଥା ଦୋହରାଇଲେ ଟ୍ରମ୍ଫ । କାଶ୍ମୀର ପ୍ରସଙ୍ଗରେ ମଧ୍ୟସ୍ଥତା କରିବାକୁ କଲେ ଇଚ୍ଛା ପ୍ରକଟ । ଯଦି ମୋଦି ଚାହାନ୍ତି ତେବେ କାଶ୍ମୀର ପ୍ରସଙ୍ଗରେ ମଧ୍ୟସ୍ଥତା କରିବେ ବୋଲି କହିଛନ୍ତି ଆମେରିକା ରାଷ୍ଟ୍ରପତି । ପୂର୍ବରୁ ଟ୍ରମ୍ପଙ୍କ ମଧ୍ୟସ୍ଥତା ବୟାନକୁ ଖଣ୍ଡନ କରିଥିଲା ଭାରତ । ସେପଟେ ବ୍ୟାଙ୍କଙ୍କ୍ ଗସ୍ତରେ ଥିବା ଭାରତୀୟ ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏ ନେଇ ମତ ରଖିଛନ୍ତି । କାଶ୍ମୀର ପ୍ରସଙ୍ଗରେ କୌଣସି ତୃତୀୟ ପକ୍ଷ ହସ୍ତକ୍ଷେପ କରିବାର ଆବଶ୍ୟକତା ନାହିଁ ବୋଲି ଆମେରିକାର ବୈଦେଶିକ ସଚିବ ମାଇକ ପମ୍ପେଓଙ୍କୁ ଜଣାଇ ଦେଇଛନ୍ତି ।
ଟ୍ରମ୍ଫ ଏପରି ମଧ୍ୟ କହିଛନ୍ତି ଯେ ଭାରତ ଓ ପାକିସ୍ତାନ ମଧ୍ୟରେ ଏହି ଲଢେଇ ଦୀର୍ଘଦିନ ଧରି ଲାଗିରହିଛି । ମତେ ଲାଗୁଛି ଦୁଇ ଦେଶ ଏବେ ଏକାଠି ହେବା ଦରକାର । ମଧ୍ୟସ୍ଥତା ପ୍ରସଙ୍ଗରେ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନଙ୍କ ସହ କଥା ହୋଇସାରିଛି । ଯଦି ଭାରତ ଚାହେଁ ତେବେ ମୁଁ ମଧ୍ୟସ୍ଥତା ପାଇଁ ପ୍ରସ୍ତୁତ ବୋଲି କହିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫ । ସେପଟେ ବୈଦେଶିକ ମନ୍ତ୍ରୀ ଏସ ଜୟଶଙ୍କର ବ୍ୟାଙ୍କଙ୍କ ଗସ୍ତରେ ଯାଇଥିବା ବେଳେ ବିଭିନ୍ନ ରାଷ୍ଟ୍ରର ବୈଦେଶିକ ମନ୍ତ୍ରୀଙ୍କ ସହ ସାକ୍ଷାତ କରିଛନ୍ତି। ତେବେ ସେ ପମ୍ପେଓଙ୍କ ସହ ସ୍ବତନ୍ତ୍ର ଆଲୋଚନା କରି ଜଣାଇ ଦେଇଛନ୍ତି ଯେ, ଏ ବିବାଦରେ କେବଳ ପାକିସ୍ତାନ ସହ ଦ୍ବିପାକ୍ଷିକ ଆଲୋଚନା ହେବ।
ତେବେ ଏଠାରେ ସୂଚନା ଥାଉ ଯେ, ନିକଟରେ ଇମ୍ରାନ ଖାନଙ୍କ ସହ ଏକ ସାକ୍ଷାତ ସମୟରେ ଡୋନାଲ୍ଡ ଟ୍ରମ୍ଫ ଏକ ବୟାନ ଦେଇଥିଲେ ଯାହାକୁ ନେଇ ବିବାଦ ସୃଷ୍ଟି ହୋଇଥିଲା । ଟ୍ରମ୍ପ କହିଥିଲେ କାଶ୍ମୀର ମାମଲାରେ ମୋଦି ତାଙ୍କୁ ମଧ୍ୟସ୍ଥତା କରିବାକୁ କହିଛନ୍ତି । ଏହିକଥା ପ୍ରଘଟ ହେବା ପରେ ଭାରତ ଏହାକୁ ଖଣ୍ଡନ କରିଥିଲା ।
କେବଳ ଭାରତ ନୁହେଁ ଆମେରିକା ସାଂସଦ ବ୍ରାଡ ସେରମେନ ନିଜ ଟ୍ବିଟର ଆକାଉଣ୍ଟରେ ଭାରତୀୟ ରାଜଦୂତ ହର୍ଷ ଶୃଙ୍ଗାଳଙ୍କ ଠାରୁ କ୍ଷମାପ୍ରାର୍ଥନା କରିଥିଲେ । ବୈଦେଶିକ ମନ୍ତ୍ରଣାଳୟର ପ୍ରବକ୍ତା ରବିଶ କୁମାର ଭାରତ ଏଭଳି ମଧ୍ୟସ୍ଥତାକୁ କେବେ ହେଲେ ସ୍ବୀକାର କରିବ ନାହିଁ ବୋଲି ଟ୍ବିଟରରେ କହିଥିଲେ ।
