ନୂଆଦିଲ୍ଲୀ: ଯାହା ଆଶା କରାଯାଉଛି ମଧ୍ୟପ୍ରଦେଶରେ ‘କମଳ’ ଆଉ ନାଥ ହୋଇ ରହିପାରିବେ ନାହିଁ । ପୁଣି ଥରେ ମଧ୍ୟପ୍ରଦେଶରେ ଶିବରାଜଙ୍କ ‘ରାଜ’ର ସମ୍ଭାବନା ଜଳଜଳ ହୋଇ ଦିଶୁଛି । ଜ୍ୟୋତିରାଦିତ୍ୟଙ୍କ ଗେରୁଆ ଡିଲ୍ ପରେ ନାଥ ସରକାର ଏବେ ଅ‘ନାଥ’ ଅର୍ଥାତ ଆସନଚ୍ୟୁତ ହେବାକୁ ଯାଉଛି । ଏହାଭିତରେ ହିନ୍ଦି ହାର୍ଟ ଲ୍ୟାଣ୍ଡର ଏକ ବଡ ରାଜ୍ୟ ହାତ, ହାତରୁ ଖସିବାକୁ ଯାଉଛି । ଅନ୍ୟପଟେ ରାଜସ୍ଥାନରେ ମଧ୍ୟ ବିଜେପି ଭୟ ଘାରିଲାଣି କଂଗ୍ରେସକୁ । ରାଜସ୍ଥାନ ବିଜେପିର ଏଜେଣ୍ଡାରେ ଅଛି କି? ଏଭଳି ପ୍ରଶ୍ନ ସ୍ବାଭାବିକ ।
ମଧ୍ୟପ୍ରଦେଶ ସଙ୍କଟ ପରେ ରାଜସ୍ଥାନ ସରକାରକୁ ଗଡାଇ ପୁଣିଥରେ ପଦ୍ମ ରାଜ କରିବା ବିଜେପିର ପରବର୍ତ୍ତୀ ଟାର୍ଗେଟ ହୋଇପାରେ । ରାଜସ୍ଥାନରେ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ ଏବଂ ଉପମୁଖ୍ୟମନ୍ତ୍ରୀ ସଚିନ୍ ପାଇଲଟଙ୍କ ଭିତରେ ସମନ୍ବୟ ପୂର୍ଣ୍ଣ ଭାବରେ ନଥିବା ବିଜେପି ପାଇଁ ସତ୍ତାର ସୁଯୋଗ ସୃଷ୍ଟି କରିପାରେ ।
ସଦ୍ୟ ଏକ ଖବରକୁ ନଜରରେ ନଜର ବୁଲାଇଲେ ଜଣାପଡେ ଯେ, ସଚିନ ପାଇଲଟ ହୀରା ବ୍ୟବସାୟୀ ରାଜୀବ ଆରୋରାଙ୍କୁ ରାଜ୍ୟସଭାକୁ ପଠାଇବାକୁ ବିରୋଧ କରିଛନ୍ତି । ଜଣେ ଦଳୀୟ ସଦସ୍ୟଙ୍କୁ ତାଙ୍କ ସ୍ଥାନରେ ରାଜ୍ୟସଭାକୁ ପଠାଇବା ପାଇଁ ପରାମର୍ଶ ଦେଇଛନ୍ତି । ଜଣେ ବ୍ୟବସାୟୀଙ୍କୁ ପଠାଇବା ଦଳ ପାଇଁ ଶୁଭଙ୍କର ନୁହେଁ ବୋଲି ତାଙ୍କ ଯୁକ୍ତି ରହିଛି । ଏପରି କ୍ଷେତ୍ରରେ ମୁଖ୍ୟମନ୍ତ୍ରୀ ଓ ଉପମୁଖ୍ୟମନ୍ତ୍ରୀଙ୍କ ଭିତରେ ମନାନ୍ତର ଓ ମତାନ୍ତର ଏକ ବିରାଟ ସମସ୍ୟା ଭାବେ ମୁଣ୍ଡ ଟେକିପାରେ ।
ସେହିଭଳି କୋଟା ସରକାରୀ ଡାକ୍ତରଖାନାରେ ପିଲାମାନଙ୍କ ମୃତ୍ୟୁ ସମେତ ଅନେକ ପ୍ରସଙ୍ଗରେ ସଚିନ ପାଇଲଟ ବିରୋଧ ସ୍ବର ଉଠାଇଛନ୍ତି । କେବଳ ଏତିକି ନୁହେଁ, ପାଇଲଟ ଅନ୍ୟାନ୍ୟ ପ୍ରସଙ୍ଗରେ ମୁଖ୍ୟମନ୍ତ୍ରୀଙ୍କ ସହ ମତଭେଦ କରିଛନ୍ତି । ଯାହା ସଚିନଙ୍କୁ ସିନ୍ଧିଆ ହେବାରେ ବେଶୀ ଦିନ ନେବ ନାହିଁ ବୋଲି କଥା ମଧ୍ୟ ଉଠୁଛି ।
ରାଜସ୍ଥାନରେ କଂଗ୍ରେସ ସରକାର ବିଦ୍ରୋହୀ ବିଏସପି ବିଧାୟକଙ୍କ ସମର୍ଥନରେ ବଞ୍ଚିଛି ।
ରାଜସ୍ଥାନ ବିଧାନସଭା 200 ଆସନ ବିଶିଷ୍ଟ । ବର୍ତ୍ତମାନ କଂଗ୍ରେସକୁ 112 ଜଣ ବିଧାୟକଙ୍କ ସମର୍ଥନ ରହିଛି, ଯେଉଁଥିରେ ସିପିଏମର 3 ଜଣ ଓ ଆରଏଲଡିରୁ ଜଣେ ଅଛନ୍ତି ।
ସେହପରି ବିଜେପିରେ 80 ଜଣ ବିଧାୟକ ଅଛନ୍ତି ଏବଂ 20 ଜଣ ବିଧାୟକଙ୍କ ସମର୍ଥନ ବିଜେପି ସପକ୍ଷରେ ଖେଳ ବଦଳାଇପାରେ । ଯଦି ବିଜେପି ମଧ୍ୟପ୍ରଦେଶ ମଡେଲକୁ ଯାଏ, ତେବେ ରାଜସ୍ଥାନ ସରକାର ମଧ୍ୟ ବିପଦରେ ଅଛନ୍ତି ବୋଲି କଂଗ୍ରେସର ଜଣେ ବରିଷ୍ଠ ନେତା କହିଛନ୍ତି ।
ଯେଉଁଭଳି ଭାବରେ ଜ୍ୟୋତିରାଦିତ୍ୟ ସିନ୍ଧିଆଙ୍କ ଦଳର 17 ଜଣ ବିଧାୟକଙ୍କୁ ନିଜ ପକ୍ଷରେ ରଖି ‘କମଳ’ଙ୍କୁ ଆଡେଇ କମଳ ଶିବିରରେ ପ୍ରବେଶ କରିଛନ୍ତି । ଅସନ୍ତୁଷ୍ଟ ନେତା ଭାବେ ଇସ୍ତଫା ପତ୍ର ସୋନିଆ ଗାନ୍ଧୀଙ୍କ ନିକଟକୁ ପଠାଇ ଦେଇଛନ୍ତି। ସେହିଭଳି ଭାବରେ ସଚ୍ଚିନ ପାଇଲଟ ସମାନ ରାସ୍ତା ଆପଣାଇବା ସମ୍ଭାବନାକୁ ଅଣଦେଖା କରାଯାଇନପାରେ ।
@IANSଇନପୁଟ
