ଥିରୁଅନନ୍ତପୁରମ: କେରଳର ପ୍ରସିଦ୍ଧ ସାବରୀମାଲା ମନ୍ଦିର ଭିତରେ ପ୍ରବେଶ କରିବା ଯୋଜନାକୁ ରଦ୍ଦ କରିଛନ୍ତି ସାମାଜିକ କର୍ମୀ ତୃପ୍ତି ଦେଶାଇ । ଶ୍ରଦ୍ଧାଳୁ, ବିଜେପି ଏବଂ ଦକ୍ଷୀଣପନ୍ଥୀ ସଂଗଠନର ପ୍ରଦର୍ଶନ ଯୋଗୁଁ ପୋଲିସ ପ୍ରଶାସନ ତୃପ୍ତିଙ୍କୁ ସୁରକ୍ଷା ଦେବାକୁ ମନା କରିଦେଇଥିଲା । ଫଳରେ ତାଙ୍କୁ ନିଜର ଯୋଜନା ବଦଳାଇବାକୁ ପଡିଛି ।
ଏନେଇ ତୃପ୍ତି କହିଛନ୍ତି, ପୋଲିସର ସୁରକ୍ଷା ନମିଳିବା କାରଣରୁ ଆମେ ଫେରିଯାଉଛୁ । ଆମେ ସାବରୀମାଳା ଦର୍ଶନ ପାଇଁ ଅନଲାଇନ ପଞ୍ଜୀକରଣ କରିଥିଲୁ । ଏନେଇ ମୁଖ୍ୟମନ୍ତ୍ରୀ ଏବଂ ପୋଲିସ ଡିଜିପିଙ୍କୁ ଇମେଲ ମଧ୍ୟ କରିଥିଲୁ । ଦୀର୍ଘ ସମୟ ଧରି ଅପେକ୍ଷା କରିବା ପରେ ମଧ୍ୟ ଆମକୁ ପୋଲିସ ପକ୍ଷରୁ ସୁରକ୍ଷା ମିଳିନଥିଲା ଏବଂ ଆମକୁ ଫେରିବାକୁ ପଡିଲା ବୋଲି ସେ କହିଛନ୍ତି ।
ତୃପ୍ତି ଏବଂ ତାଙ୍କ ଦଳ ସାବରୀମାଳା ଦର୍ଶନ ପାଇଁ ମଙ୍ଗଳବାର ସକାଳେ ନାଦୁମ୍ବାସେରୀ ବିମାନବନ୍ଦର ପହଞ୍ଚିଥିଲେ । ସେଠାରୁ ସେମାନେ କୋଚିର ପୋଲିସ କମିଶନର କାର୍ଯ୍ୟାଳୟକୁ ଯାଇଥିଲେ । କିନ୍ତୁ ସେପଟେ ତୃପ୍ତିଙ୍କ ମନ୍ଦିର ପ୍ରବେଶକୁ ବିରୋଧ କରି ବିଜେପି ଏବଂ ସାବରୀମାଳା କାର୍ଯ୍ୟକର୍ତ୍ତା କମିଶନର କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ ।
ସୂଚନାଯୋଗ୍ୟ ଯେ, ଗତବର୍ଷ ସବୁ ବର୍ଗର ମହିଳାଙ୍କୁ ସାବରୀମାଲା ମନ୍ଦିରରେ ପ୍ରବେଶ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଥିଲେ। ଏହା ବିରୋଧରେ ଏକାଧିକ ଆବେଦନ ସୁପ୍ରିମକୋର୍ଟରେ ହୋଇଥିଲା। ଏବେ ସୁପ୍ରିମକୋର୍ଟର ୭ ଜଣିଆ ଖଣ୍ତପୀଠ ଏହାର ବିଚାର କରିବେ। ଅର୍ଥାତ ପୂର୍ବରୁ ମହିଳାଙ୍କ ପ୍ରବେଶ ପାଇଁ ସୁପ୍ରିମକୋର୍ଟ ଦେଇଥିବା ରାୟ କାଏମ ରହିଛି। ତଥାପି ମନ୍ଦିରକୁ ମହିଳାଙ୍କ ପ୍ରବେଶ ଉପରେ ଅଙ୍କୁଶ ଲାଗିଛି।
