ନୂଆଦିଲ୍ଲୀ: ସାଙ୍ଗକୁ ଟ୍ରକ ସାମନାକୁ ଧକ୍କା ଦେବା ଅଭିଯୋଗରେ ଜଣେ 29 ବର୍ଷୀୟ ଯୁବକଙ୍କୁ ଗିରଫ କରିଛି ମୁମ୍ବାଇ ପୋଲିସ । ଘଟଣାଟି ଘଟିଛି ଯାତ୍ରିକ ବାର ଆଣ୍ଡ ରେଷ୍ଟୁରାଣ୍ଟ ସମ୍ମୁଖରେ । ସମ୍ପୂର୍ଣ୍ଣ ଘଟଣାଟି ଏକ ଫୋନକୁ ନେଇ ଘଟିଛି । ଦୁର୍ଘଟଣାରେ ଗୁରୁତର ହୋଇଥିବା କିଶୋର କାଇଲାତ(32)ଙ୍କ ରବିବାର ସକାଳେ ମୃତ୍ୟୁ ହୋଇଛି ।
ସୂଚନାଯୋଗ୍ୟ, ଶନିବାର ଦିନ କିଶୋର ନିଜ ବନ୍ଧୁ ବିଜୟ ସାଲ୍ବେ ସହ ମଦ ପିଇଥିଲା । କିଛି ସମୟ ପରେ ସେଠାରେ ଅଭିଯୁକ୍ତ ଶିବା ମୋହିତ ପହଞ୍ଚିଥିଲା । ପରେ କିଶୋର ଶିବାର ପରିଚୟ ବିଜୟ ସହ କରାଇଥିଲେ । ତେବେ ଶିବା କିଶୋରକୁ କଥା ହେବା ପାଇଁ ଫୋନ ମାଗିଥିଲା । କିନ୍ତୁ କିଶୋର ନିଜ ଫୋନ ଦେବାକୁ ମନା କରି ଦେଇଥିଲା । ଯାହାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । କିଶୋର ଏବଂ ବିଜୟ ବାର ବାହାରକୁ ଚାଲି ଆସିଥିଲେ । ଶିବା ମଧ୍ୟ ହାତରେ ଛୁରୀ ଧରି ତାଙ୍କ ପିଛା କରିଥିଲା ।
କିଛି ସମୟ ପିଛା କରିବା ପରେ ଶିବା କିଶୋରର ସାର୍ଟ କର୍ଲର ଧରି ଦ୍ରୁତଗତିରେ ଆସୁଥିବା ଏକ ଟ୍ରକ ସାମନାକୁ ଧକ୍କା ଦେଇଥିଲା । ଏଥିରେ କିଶୋର ଗୁରୁତର ହୋଇ ତଳେ ପଡି ଯାଇଥିଲେ । ତାଙ୍କୁ ଚିକିତ୍ସା ପାଇଁ କେଇଏମ ହସ୍ପିଟାଲ ନିଆଯାଇଥିଲା । ମାତ୍ର ଚିକିତ୍ସାଧୀନ ଅବସ୍ଥାରେ ତାର ମୃତ୍ୟୁ ହୋଇଛି ।
