ଲକ୍ଷ୍ନୌ: ଉତ୍ତର ପ୍ରଦେଶରୁ ଆସିଛି ଏପରି ଏକ ଭିଡିଓ ଯାହାକୁ ଦେଖିଲେ ଆପଣଙ୍କ ଛାତି ଥରି ଉଠିବ । ଜଣେ 60 ବର୍ଷର ବୃଦ୍ଧାଙ୍କୁ ଅତି ନିର୍ମମ ଭାବେ ଗୁଳି କରି ହତ୍ୟା କରାଯାଉଛି । ତେବେ ଆଶ୍ଚର୍ଯ୍ୟର ବିଷୟ ହେଉଛି, ଘଟଣାସ୍ଥଳରେ ଉପସ୍ଥିତ ଥିବା ପଡୋଶୀମାନେ ଏହାକୁ ଉପଭୋଗ କରୁଛନ୍ତି ଆଉ ଏହାର ଭିଡିଓ ବନାଉଛନ୍ତି ।
ସାହାଯ୍ୟ ପାଇଁ ବୃଦ୍ଧା ଜଣକ ପାଟି କରି କାନ୍ଦୁଥିବାର ଦୃଶ୍ୟ ମଧ୍ୟ ରହିଛି । କିନ୍ତୁ ବ୍ୟକ୍ତି ଜଣକ ଦ୍ବିତୀୟ ଥର ଗୁଳି କରିବା ପରେ ସେ ଘଟଣାସ୍ଥଳରେ ହିଁ ଟଳିପଡିଥିଲେ । ଉତ୍ତରପ୍ରଦେଶ କସଗଞ୍ଜର ଏହି ଭିଡିଓ । ବୃଦ୍ଧାଙ୍କୁ ବ୍ୟକ୍ତି ଜଣକ ପିସ୍ତଲ ଦେଖାଇ ଧମକ ଦେଉଥିବାର ଦେଖିବାକୁ ମିଳିଛି । ବୃଦ୍ଧା ଜଣକ ତାଙ୍କ କବଳରୁ ପଳାଇଯିବାକୁ ଚେଷ୍ଟା ମଧ୍ୟ କରୁଛନ୍ତି । କିନ୍ତୁ ବିଫଳ ହୋଇଛନ୍ତି । ଶେଷରେ ଗୁଳିର ଶିକାର ହୋଇ ପ୍ରାଣ ହରାଇଛନ୍ତି ।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତକୁ ଗିରଫ କରିଛି। ସେ କାହିଁକି ହତ୍ୟା କରିଛି ତାହା ସ୍ପଷ୍ଟ କରିନାହିଁ। ଏହି ହତ୍ୟାକାଣ୍ଡର ଭିଡିଓ ସୁଟିଂ କରିଥିବା ପଡ଼ୋଶୀଙ୍କ ବିରୋଧରେ ମଧ୍ୟ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ ସୂଚନା ଦେଇଛି ।
