ବାରଣାସୀ: ଉନ୍ନତମାନର ପିକଚର କ୍ୱାଲିଟି ସାଙ୍ଗକୁ ପୁରୁଣା ଇତିହାସର ନବକଳେବର । ପୁରାତନ କାଶୀ ସହର ଯାହାକି ଏବେ ବନାରସ ଭାବେ ଖ୍ୟାତ ତାହାର ସମୃଦ୍ଧ ଐତିହକୁ ଦେଖାଇବାକୁ ଚେଷ୍ଟା କରିଛି କେନ୍ଦ୍ର ସଂସ୍କୃତି ମନ୍ତ୍ରାଳୟ । ଆଉ ଆଜି ଏଭଳି ଏକ ଅତ୍ୟାଧୁନିକ ମ୍ୟୁଜିୟମର ଉଦଘାଟନ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ବାରଣାସୀର ମନ ମହଲରେ ଏହି ମ୍ୟୁଜିୟମର ଉଦଘାଟନ କରିଛନ୍ତି ମୋଦି । ଏହି ଥ୍ରୀଡି ସଂଗ୍ରହାଳୟକୁ ୬ ଭାଗରେ ବିଭକ୍ତ କରାଯାଇଛି ।
ପ୍ରଥମ ଭାଗରେ କାଶୀର ଅୟମାରମ୍ଭ, ଦ୍ଵିତୀୟ ଭାଗରେ ସମ୍ପୂର୍ଣ୍ଣ କାଶୀ ଓ ତୃତୀୟ ଭାଗରେ କିଭଳି ହେଲା ବନାରସ ଏହି ସବୁ ଐତିହ କଳା ସ୍ଥାନ ପାଇଛି । ସେହିପରି ଚତୁର୍ଥ ଭାଗରେ ଗଙ୍ଗା, ପଞ୍ଚମ ଭାଗରେ ଯଜ୍ଞ ସହ ଷଷ୍ଠ ଭାଗରେ ଜ୍ଞାନର କେନ୍ଦ୍ର ରହିବ । ବିଶେଷ କରି ଥ୍ରୀଡି ଶିବଲିଙ୍ଗ ସହ ବନାରସୀ ପାନ ,ବାରାଣସୀର ଗଳିକନ୍ଦି ବି ସ୍ଥାନ ପାଇଛି । ବଡ଼କଥା ସଂଗୀତରେ କିଭଳି କାଶୀ ସମୃଦ୍ଧ ସହ ବନାରସୀ ଶାଢ଼ୀ ଓ ରାମଲୀଳା ମଧ୍ୟ ପ୍ରଦର୍ଶିତ ହୋଇଛି ।
ତେବେ ପର୍ଯ୍ୟଟକଙ୍କୁ ଆକୃଷ୍ଟ କରିବାପାଇଁ ଟଚସ୍କ୍ରିନ ସାଙ୍ଗକୁ HD କ୍ୱାଲିଟିର ଭିଜୁଆଲାଇଜେସନ ମଧ୍ୟ କରାଯାଇଛି । ଆଉ ଏହି ମ୍ୟୁଜିୟମରେ ଅତି ସୁନ୍ଦର ଭାବରେ ସ୍ଥାନିତ ହୋଇଛି କାଶୀ ବିଶ୍ୱନାଥଙ୍କ ମହାନ ଲୀଳା । ସ୍ୱୀକାର କରିବାକୁ ପଡିବ ଆଧୁନିକ ଜ୍ଞାନକୌଶଳରେ ନିଶ୍ଚିତ ଭାବେ ସଂସ୍କୃତି ଓ ଐତିହର ପ୍ରସାର କରିବାରେ ଭଲ ଉଦ୍ୟମ କରାଯାଇଛି ।
