ଲକ୍ଷ୍ନୌ: ଯୋଗାସନ ସହ ନିଜ ବୟାନବାଜିଙ୍କୁ ନେଇ ମଧ୍ୟ ଚର୍ଚ୍ଚାରେ ରହି ଆସିଛନ୍ତି ଯୋଗଗୁରୁ ରାମଦେବ ବାବା । ବର୍ତ୍ତମାନ ସେ ପୁଣି ଚର୍ଚ୍ଚାରେ ରହିଛନ୍ତି । ଯୋଗଗୁରୁ ବାବା ରାମଦେବ ବଲିଉଡର ଜଣାଶୁଣା ଅଭିନେତା ଓ ଅଭିନେତ୍ରୀଙ୍କୁ ଟାର୍ଗେଟ କରିଛନ୍ତି । ବଲିଉଡ କଳାକାର ଡ୍ରଗ୍ସ ସେବନ କରୁଥିବା ଅଭିଯୋଗ କରି କଡ଼ା ଆଲୋଚନା କରିଛନ୍ତି ବାବା । ଏପରିକି ଦବଙ୍ଗ ଅଭିନେତା ସଲମାନ ଖାନଙ୍କୁ ମଧ୍ୟ ଛାଡ଼ି ନାହାନ୍ତି । ବାବା ଏଭଳି କିଛି ବୟାନବାଜି କରୁଥିବାବେଳେ, ତାଙ୍କ ଭିଡିଓ ଭାଇରାଲ ହେବାରେ ଲାଗିଛି(Ramdev allegation against Salmal khan) ।
ରବିବାର ଉତ୍ତର ପ୍ରଦେଶର ମୁରାଦାବାଦରେ ଆର୍ଯ୍ୟବୀର ବୀରଙ୍ଗନା ସମ୍ମିଳନୀରେ ଯୋଗ ଦେଇଥିଲେ ବାବା ରାମଦେବ । ଭାଷଣ ଦେଉ ଦେଉ ଡ୍ରଗ୍ସ୍ ସେବନ ଉପରେ ଆଲୋଚନା ଆରମ୍ଭ କରିଥିଲେ ବାବା ରାମଦେବ । ସେ କହିଥିଲେ, "ବଲିଉଡ୍କୁ ଡ୍ରଗ୍ସ୍ କବଳିତ କରିଛି । ବଲିଉଡ୍ରେ ଡ୍ରଗ୍ସ୍ ରାଜନୀତିରେ ମଧ୍ୟ ଡ୍ରଗ୍ସ୍ ପ୍ରବେଶ କରିଛି । ପିଲା ବର୍ବାଦ ହେଉଛନ୍ତି । ଛାତ୍ରଛାତ୍ରୀ ବର୍ବାଦ ହେଉଛନ୍ତି । ବଲିଉଡ୍ରେ ସଲ୍ମାନ ଖାନ୍ ଡ୍ରଗ୍ସ୍ ସେବନ କରୁଛନ୍ତି । ଆମିର ଖାନ୍ଙ୍କ କଥା ଜାଣିନି । ଶାହାରୁଖ ଖାନ୍ଙ୍କ ପୁଅ ଆର୍ଯ୍ୟନ ଖାନ୍ ମଧ୍ୟ ଡ୍ରଗ୍ସ୍ ନେଇ ଧରା ପଡିଥିଲେ । ବଲିଉଡ୍ ଅଭିନେତ୍ରୀଙ୍କ କଥା ଭଗବାନଙ୍କୁ ଜଣା ।"
ବଲିଉଡ ସହ ରାଜନୈତିକ ଜଗତକୁ ମଧ୍ୟ ଟାର୍ଗେଟ୍ କରିଛନ୍ତି ବାବା ରାମଦେବ । ରାମଦେବଙ୍କ ମୁତାବକ ରାଜନୈତିକ ବ୍ୟକ୍ତି ବିଶେଷ ମଧ୍ୟ ଡ୍ରଗ୍ସ୍ର ସେବନ କରୁଛନ୍ତି । ନିର୍ବାଚନ ସମୟରେ ଲୋକଙ୍କୁ ନିଶାଦ୍ରବ୍ୟ ବଣ୍ଟନ କରାଯାଉଛି । ଭାରତକୁ ନିଶାମୁକ୍ତ କରିବାକୁ ଆହ୍ବାନ ଦେଇଛନ୍ତି ରାମଦେବ ବାବା । ଏଥିପାଇଁ ଆନ୍ଦୋଳନ କରିବାକୁ ଆହ୍ବାନ ଦେଇଛନ୍ତି । ଏଭଳି ଭିଡିଓ ଏବେ ଭାଇରାଲ ହେବାପରେ କିଛି ବଲିଉଡ ଓ ରାଜନୈତିକ ବ୍ୟକ୍ତି ବିଶେଷ ଏହାକୁ ନେଇ ପ୍ରତିକ୍ରିୟା ଦେବାରେ ଲାଗିଛନ୍ତି ।
