ଜୟପୁର: ବିଧାନସଭା ଜନଦେଶ ପ୍ରକାଶ ପାଇବାକୁ ପ୍ରାୟ ସପ୍ତାହେ ବତିବାକୁ ବସିଥିବା ବେଳେ 3 ରାଜ୍ୟରେ ବହୁମତ ପାଇଥିବା ଭାରତୀୟ ଜନତା ପାର୍ଟି (ବିଜେପି) ଏପର୍ଯ୍ୟନ୍ତ ମୁଖ୍ୟମନ୍ତ୍ରୀ ଘୋଷଣା କରିପାରିନି । ଏକାଧିକ ଆଶାୟୀଙ୍କ ମଧ୍ୟରେ ଦଳ ବିଭିନ୍ନ ଦିଗକୁ ନେଇ ବିଚାର ବିମର୍ଶ ଜାରି ରଖିଛି । ଏହାରି ମଧ୍ୟରେ ଏହି ବିଳମ୍ବିତ କାରଣ ମଧ୍ୟ ବିରୋଧୀଙ୍କୁ ସମାଲୋଚନା ପାଇଁ ଏକ ଖୋରାକ ଦେଇଛି । ରାଜସ୍ଥାନର ପୂର୍ବତନ ମୁଖ୍ୟମନ୍ତ୍ରୀ ଅଶୋକ ଗେହେଲଟ ବିଜେପିରେ ଶୃଙ୍ଖଳା ଅଭାବ କାରଣରୁ ମୁଖ୍ୟମନ୍ତ୍ରୀ କି’ଏ ହେବେ ସେ ନେଇ ଏପର୍ଯ୍ୟନ୍ତ ସ୍ପଷ୍ଟ ହୋଇପାରୁନି ବୋଲି କହି କଟାକ୍ଷ କରିଛନ୍ତି ।
ଖବର ସରବରାହ ସଂସ୍ଥା ‘ଏଏନଆଇ’କୁ ପ୍ରତିକ୍ରିୟା ଦେଇ ଗେହେଲଟ କହିଛନ୍ତି, ‘‘ବିଜେପିରେ କୌଣସି ଶୃଙ୍ଖଳା ନାହିଁ । ଆମେ ଯଦି ଜନାଦେଶ ପାଇବା ପରେ ମୁଖ୍ୟମନ୍ତ୍ରୀ ଚୟନରେ ଏପରି ବିଳମ୍ବ କରିଥାନ୍ତୁ , ତେବେ ସେମାନେ ଆମକୁୁ କେମିତି ସମାଲୋଚନା କରିଥାନ୍ତେ, ତାହା କହିବା ଅସମ୍ଭବ । ସେମାନେ ଲୋକଙ୍କୁ ଭ୍ରମିତ କରିଥାଆନ୍ତେ । ସେମାନେ ଏହି ନିର୍ବାଚନକୁ ଧ୍ରୁବିକରଣ କରି ଜିତିଛନ୍ତି । ଧାରା-370 ଉଚ୍ଛେଦ, କହ୍ନେୟାଲାଲ ହତ୍ୟା ପ୍ରସଙ୍ଗକୁ ନିର୍ବାଚନରେ ଉଠାଇଛନ୍ତି । କିନ୍ତୁ ଆମେ ନୂଆ ସରକାରକୁ ସହଯୋଗ କରିବୁ ।’’
ଚଳିତଥର ନିର୍ବାଚନରେ ଭାରତୀୟ ଜନତା ପାର୍ଟି ରାଜସ୍ଥାନ, ମଧ୍ୟ ପ୍ରଦେଶ ଓ ଛତିଶଗଡରେ ବହୁମତ ହାସଲ କରିଛି । 3 ତାରିଖରେ ଫଳାଫଳ ପ୍ରକାଶ ପାଇଥିଲା ବେଳେ ଏପର୍ଯ୍ୟନ୍ତ ବିଜେପି ଏହି 3 ରାଜ୍ୟରେ ମୁଖ୍ୟମନ୍ତ୍ରୀ ଘୋଷଣା କରିନି । ଏହି ରାଜ୍ୟଗୁଡିକରେ ଏକାଧିକ ବରିଷ୍ଠ ଚେହେରା ମୁଖ୍ୟମନ୍ତ୍ରୀ ଦାବିଦାର ରହିଛନ୍ତି । ଦଳ ଫଳାଫଳ ପ୍ରକାଶ ପାଇବା ପରଠାରୁ ଦିଲ୍ଲୀରେ ମାରାଥନ ମିଟିଂ ଜାରି ରଖିଛି । ହେଲେ ଏପର୍ଯ୍ୟନ୍ତ କୌଣସି ସ୍ପଷ୍ଟ ସଙ୍କେତ ମଧ୍ୟ ମିଳୁନି ।
ରାଜସ୍ଥାନରେ ବିଜେପି 115 ଆସନ ଜିତି କ୍ଷମତାକୁ ଆସିଥିବା ବେଳେ ଶାସକ କଂଗ୍ରେସ ମାତ୍ର 69 ଆସନ ସହ ବିରୋଧୀ ଦଳ ଭୂମିକାକୁ ଫେରିବାରୁ ବାଧ୍ୟ ହୋଇଛି । ବସୁନ୍ଧରା ରାଜେ ସିନ୍ଧିଆ ମୁଖ୍ୟମନ୍ତ୍ରୀ ଆଶାୟୀ ଭାବେ ସବୁଠୁ ଆଗରେ ରହିଛନ୍ତି । ମାତ୍ର ଦଳ ନୂଆ ଚେହେରା ଖୋଜୁଥିବା ଚର୍ଚ୍ଚା ହେଉଛି । ସେ ଦୃଷ୍ଟିରୁ ସାଂସଦ ପଦରୁ ଇସ୍ତଫା ଦେଇଥିବା ବାଲକନାଥଙ୍କ ନାମ ମଧ୍ୟ ରେସରେ ରହିଛି । ସୋମବାର ମଧ୍ଯରେ ବିଜେପି 3 ରାଜ୍ୟରେ ମୁଖ୍ୟମନ୍ତ୍ରୀ ଚେହେରେ ସ୍ପଷ୍ଟ କରିପାରେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
