ଶ୍ରୀନଗର: ପ୍ରସିଦ୍ଧ ଅମରନାଥ ପୀଠରେ ବାଦଲ ଫଟା ବର୍ଷାରେ ସୃଷ୍ଟି ହୋଇଥିବା ଖଣ୍ଡପ୍ରଳୟ ପରେ ଆଜି ଠାରୁ ପୁଣି ଆରମ୍ଭ ହେବାକୁ ଯାଉଛି ପ୍ରସିଦ୍ଧ ଅମରନାଥ ଯାତ୍ରା । ତେବେ ସ୍ଥିତିକୁ ଦେଖି ଯାତ୍ରା ପଥରେ ସାମାନ୍ୟ ପରିବର୍ତ୍ତନ ମଧ୍ୟ କରାଯାଇଛି । ନୁନଓ୍ବାନ ପହଲଗାମ ସାଇଡ (Nunwan Pahalgam side)ରୁ ଶ୍ରଦ୍ଧାଳୁମାନେ ପୁଣି ବାବାଙ୍କ ଗୁମ୍ଫା ଅଭିମୁଖେ ଯାତ୍ରା ଆରମ୍ଭ କରିବା ନେଇ ଯାତ୍ରାର ପରିଚାଳନା କରୁଥିବା ଅମରନାଥ ଜୀ ସ୍ରାଇନ ବୋର୍ଡ (Shri Amarnath Ji Shrine Board) ପକ୍ଷରୁ ସୂଚନା ମିଳିଛି ।
ସେହିପରି ବାଲତଲ ବେସ କ୍ୟାମ୍ପରେ ମଧ୍ୟ ଅପେକ୍ଷା କରିଥିବା ଯାତ୍ରୀଙ୍କୁ ଆଜି ଗୁମ୍ଫା ଅଭିମୁଖେ ଯାତ୍ରା ପାଇଁ ଅନୁମତି ମିଳିବ । ବାଦଲ ଫଟା ବର୍ଷାରେ ପ୍ରାୟ 16 ଜଣ ତୀର୍ଥଯାତ୍ରୀଙ୍କ ପ୍ରାଣହାନୀ ଘଟିଥିବା ବେଳେ ଅନେକ ଆହତ ହୋଇଥିଲେ । ସ୍ଥଳସେନା, ITBP, NDRF ଓ ବାୟୁସେନାର ମିଳିତ ଉଦ୍ଧାର ଅପରେସନରେ ମୃତଦେହ ଉଦ୍ଧାର କରିବା ସହ ଆହତଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଥିଲା । ଦୀର୍ଘ 3 ଦିନର ଉଦ୍ଧାର ଅପରେସନରେ ଗୁମ୍ଫା ନିକଟସ୍ଥ ଯାତ୍ରୀ ଶିବିରରୁ ପ୍ରାୟ 15 ହଜାର ଶ୍ରଦ୍ଧାଳୁଙ୍କୁ ସୁରକ୍ଷିତ ସ୍ଥାନକୁ ଅଣାଯାଇଥିବା ITBP ପକ୍ଷରୁ ସୂଚନା ଦିଆଯାଇଛି ।
