ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ଘୋଟାଲା ମାମଲାରେ ଗିରଫ ହୋଇ ପ୍ରବର୍ତ୍ତନ ନିର୍ଦ୍ଦେଶାଳୟ ରିମାଣ୍ଡରେ ଥିବା ଆମ ଆଦମୀ ପାର୍ଟି ସାଂସଦ ସଞ୍ଜୟ ସିଂ ଇଡି ବିରୋଧରେ କୋର୍ଟରେ ହାଜର ହୋଇଛନ୍ତି । ରିମାଣ୍ଡ ଅବଧି ମଧ୍ୟରେ ପ୍ରବର୍ତ୍ତନ ନିର୍ଦ୍ଦେଶାଳୟ ତାଙ୍କୁ କାର୍ଯ୍ୟାଳୟ ହାଜତ ପରିବର୍ତ୍ତେ ପୋଲିସ କଷ୍ଟଡିକୁ ସ୍ଥାନାନ୍ତରିତ କରିବାକୁ ଯୋଜନା ରଖିଥିବା ସେ ପିଟିସନରେ ଦର୍ଶାଇଛନ୍ତି । ତାଙ୍କୁ କେନ୍ଦ୍ରୀୟ ତଦନ୍ତକାରୀ ସଂସ୍ଥାର କାର୍ଯ୍ୟାଳୟ ହାଜତ ପରିବର୍ତ୍ତେ ତୋଗଲକ ରୋଡରେ ଥିବା ପୋଲିସ ଷ୍ଟେସନକୁ ସ୍ଥାନାନ୍ତରିତ କରି ନିର୍ଯାତନା ଦେବାକୁ ଚକ୍ରାନ୍ତ ଚାଲିଥିବା ନେଇ ଏକ ପିଟିସନ ସହ ସେ ରାଉଜ ଆଭିନ୍ୟୁ କୋର୍ଟରେ ହାଜର ହୋଇଛନ୍ତି ।
ଆବେଦନରେ ସଞ୍ଜୟ ଦର୍ଶାଇଛନ୍ତି, ତାଙ୍କୁ ତୋଗଲକ ରୋଡ ପୋଲିସ ଷ୍ଟେସନ ଲକଅପକୁ ସ୍ଥାନାନ୍ତରିତ କରାଯିବାକୁ ଯୋଜନା ରଖାଯାଇଛି । ସେଠାରେ ତାଙ୍କୁ ସିସିଟିଭି ଆଢୁଆଳରେ ନିର୍ଯାତନା ଦେବା ପାଇଁ ମଧ୍ୟ ଯୋଜନା ରଖାଯାଇଛି । ସେ ଏ ସମ୍ପର୍କରେ ପଚାରିବାରୁ ସଂସ୍ଥା ତରଫରୁ କୁହାଯାଇଥିଲା ଯେ, କୌଣସି କାରଣ ପାଇଁ ଇଡି କାର୍ଯ୍ୟାଳୟରେ ଥିବା ଲକଅପରେ କୀଟନାଶକ ବ୍ୟବହାର କରାଯାଇଛି । ସେଥିପାଇଁ ତାଙ୍କୁ ଅନ୍ୟତ୍ର ସ୍ଥାନାନ୍ତରିତ କରିବାକୁ ହେବ ।
ତେବେ ଏଭଳି ଉତ୍ତରରେ କ’ଣ ଏକ କେନ୍ଦ୍ରୀୟ ଏଜେନ୍ସି ନିକଟରେ ମାତ୍ର ଗୋଟିଏ ଲକଅପ ରହିଛି ବୋଲି ସଞ୍ଜୟ ପ୍ରଶ୍ନ କରିଥିଲେ । ଯଦି ଏପରି କାରଣ ଅଛି ତାଙ୍କୁ ସଂସ୍ଥା ମୁଖ୍ୟାଳୟର ଅନ୍ୟ କୌଣସି ଲକଅପକୁ ସ୍ଥାନାନ୍ତରିତ କରାଯାଉ ବୋଲି ସେ ଦାବି କରିଛନ୍ତି । ଏହି ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟକୁ ଉତ୍ତର ରଖିବାକୁ କୋର୍ଟ କହିଛନ୍ତି ।
ଏହା ମଧ୍ୟ ପଢନ୍ତୁ:-Delhi Excise Policy Case: 5 ଦିନିଆ ରିମାଣ୍ଡରେ ଗଲେ ସଞ୍ଜୟ ସିଂ
ବୁଧବାର ଦିଲ୍ଲୀ ଅବକାରୀ ନୀତି ଘୋଟାଲା ମାମଲାରେ ବାସଭବନରେ ଦିନ ତମାମ ଚଢାଉ ଓ ଏକାଧିକ ଘଣ୍ଟା ଜେରା ପରେ ପ୍ରବର୍ତ୍ତନ ନିର୍ଦ୍ଦେଶାଳୟ ସାଂସଦ ସଞ୍ଜୟ ସିଂଙ୍କୁ ଗିରଫ କରିଥିଲା । ଗୁରୁବାର ପୂର୍ବାହ୍ନରେ ସଞ୍ଜୟଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା ପରେ ଅପରାହ୍ନରେ ତାଙ୍କୁ ରାଉଜ ଆଭିନ୍ୟୁ କୋର୍ଟର ସ୍ବତନ୍ତ୍ର ଜଜଙ୍କ ନିକଟରେ ହାଜର କରାଯାଇଥିଲା । ଏହି ମାମଲାରେ ଅଧିକ ଜେରା ଆଧାରରେ ଡିଜିଟାଲ ପ୍ରମାଣ ଏକାଠି କରିବା ପାଇଁ ୧୦ ଦିନିଆ ରିମାଣ୍ଡ ଆବେଦନ କରିଥିଲା ଇଡି । କୋର୍ଟ ସଞ୍ଜୟଙ୍କୁ ୫ ଦିନିଆ ରିମାଣ୍ଡରେ ପଠାଇଛନ୍ତି । ୧୦ ତାରିଖ ପର୍ଯ୍ୟନ୍ତ ସେ ପ୍ରବର୍ତ୍ତନ ନିର୍ଦ୍ଦେଶାଳୟ କଷ୍ଟଡିରେ ଜେରା ହେବେ।
ବ୍ୟୁରୋ ରିପୋର୍ଟ, ଇଟିଭି ଭାରତ
