ହାଇଦ୍ରାବାଦ: ତେଲୁଗୁ ଅଭିନେତା ମହେଶ ବାବୁଙ୍କ ଘରୁ ଚୋରି ଉଦ୍ୟମ । ହାଇଦ୍ରାବାଦ ସ୍ଥିତ ଜୁବଲି ହିଲସ ରୋଡ ନମ୍ବର ୮୧ରେ ରହୁଥିବା ଅଭିନେତା ମହେଶ ବାବୁଙ୍କ ଘରୁ ମଙ୍ଗଳବାର ରାତିରେ ଚୋରି ପାଇଁ ଉଦ୍ୟମ କରିଥିଲା ଚୋର । ଚୋରଟି ଘରର ୩୦ ଫୁଟ୍ କାନ୍ଥ ଉପରକୁ ଚଢ଼ି ଘର ଭିତରକୁ ଡେଇଁଥିଲା । କିନ୍ତୁ ତଳେ ପଡି ଆହତ ହୋଇଥିଲା । ଶବ୍ଦ ଶୁଣି ଘର ବାହାରେ ଜଗିଥିବା ସିକ୍ୟୁରିଟି ଗାର୍ଡ ତୁରନ୍ତ ଘର ଭିତରକୁ ପଶିଥିଲା । ସେଠାରେ ଚୋର ଜଣକ ଗୁରୁତର ଭାବେ ଆହତ ହୋଇ ତଳେ ପଡ଼ିଥିବା ଦେଖିବାକୁ ପାଇଥିଲେ । ଉପସ୍ଥିତ ପରିବାର ଲୋକେ ଚୋରକୁ କାବୁ କରିନେଇଥିଲେ । ଏହାସହ ତୁରନ୍ତ ପୋଲିସକୁ ଖବର ଦେଇଥିଲେ ।
ତେବେ ଏହି ଚୋରର ନାଁ କ୍ରିଷ୍ଣା ବୋଲି ପୋଲିସ ସୂତ୍ରରୁ ପ୍ରକାଶ । ଗତ କିଛିଦିନ ହେବ ଚୋର କ୍ରିଷ୍ଣା ଓଡ଼ିଶାରୁ ହାଇଦ୍ରାବାଦକୁ ଆସିଥିଲା । ଅନ୍ୟପକ୍ଷରେ ଗୁରୁତର ଭାବେ ଆହତ ହୋଇଥିବା ଚୋରକୁ ଏବେ ସ୍ଥାନୀୟ ଓସମାନିଆ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ଏସମ୍ପର୍କରେ ପୋଲିସ କହିଛି ଘଟଣାର ତଦନ୍ତ ଚାଲିଛି । ଖୁବଶୀଘ୍ର ସତ ସାମ୍ନାକୁ ଆସିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
