ନୂଆଦିଲ୍ଲୀ: ରାଷ୍ଟ୍ରୀୟ ରାଜଧାନୀରେ ପ୍ରାୟ ୨୮ ପ୍ରତିଶତ ପରିବାରର ଏକାଧିକ ସଦସ୍ୟଙ୍କଠାରେ ଫ୍ଲୁ ଭଳି ଲକ୍ଷଣ ଦେଖାଯାଇଛି । ଦିଲ୍ଲୀରେ କରାଯାଇଥିବା ଏକ ସର୍ବେକ୍ଷଣରୁ ଏହା ଜଣାପଡିଛି । ଲୋକାଲ ସର୍କଲ ନାମକ ଏକ ପ୍ଲାଟଫର୍ମ ଦ୍ବାରା ଅନଲାଇନରେ ଲୋକଙ୍କ ଉପରେ ଏହି ସର୍ଭେ କରାଯାଇଥିଲା । ଜ୍ବର, ଥଣ୍ଡା, କାଶ, ମୁଣ୍ଡବ୍ୟଥା ଏବଂ ଶରୀରରେ ଯନ୍ତ୍ରଣା ଭଳି ଫ୍ଲୁ ଲକ୍ଷଣ ରହିଥିବା କେତେଜଣ ସଦସ୍ୟ ପରିବାରର ରହିଛନ୍ତି ସେ ବାବଦରେ ସର୍ଭେରେ ସାମିଲ ବ୍ୟକ୍ତିବିଶେଷଙ୍କୁ ପଚରା ଯାଇଥିଲା ।
ଜବାବରେ ଦିଲ୍ଲୀର ୬ ପ୍ରତିଶତ ବାସିନ୍ଦା କହିଛନ୍ତି, ବର୍ତ୍ତମାନ ସେମାନଙ୍କ ପରିବାରର ଚାରିରୁ ଅଧିକ ସଦସ୍ୟଙ୍କ ମଧ୍ୟରେ ଫ୍ଲୁ ଲକ୍ଷଣମାନ ରହିଛି । ସେହିପରି ୧୧ ପ୍ରତିଶତ ଦିଲ୍ଲୀ ନିବାସୀ ପରିବାରରେ ୨-୩ ଜଣଙ୍କ ଠାରେ ଏହିଭଳି ଲକ୍ଷଣ ରହିଥିବା କହିଥିବାବେଳେ ଅନ୍ୟ ୧୧ ପ୍ରତିଶତ ଜନସାଧାରଣ ପରିବାରର ଜଣେ ସଦସ୍ୟ ଫ୍ଲୁ ସଂକ୍ରମିତ ଥିବା ଜଣାଇଛନ୍ତି । ସେହିପରି ସର୍ଭେ ପରିସରଭୁକ୍ତ ଦିଲ୍ଲୀର ୭୨ ପ୍ରତିଶତ ନିବାସୀଙ୍କ ପରିବାରରେ କେହି ଜଣଙ୍କ ଠାରେ ବି ସେଭଳି କିଛି ଲକ୍ଷଣ ନଥିବା କହିଛନ୍ତି ।
ସର୍ଭେ ଅନୁଯାୟୀ, ଦିଲ୍ଲୀର ମୋଟ ୨୮ ପ୍ରତିଶତ ପରିବାରରେ ଏକ ବା ଏକାଧିକ ବ୍ୟକ୍ତି ଫ୍ଲୁ ଭଳି ଲକ୍ଷଣରେ ପୀଡିତ ଅଛନ୍ତି । ଗୋଟିଏ ପଟେ ସମ୍ଭାବ୍ୟ ତୃତୀୟ ଲହରକୁ ନେଇ କଳ୍ପନାଜଳ୍ପନା ଜାରି ରହିଥିବା ବେଳେ ଏହାମଧ୍ୟରେ ଫ୍ଲୁ ମାମଲାରେ ବୃଦ୍ଧି ଚିନ୍ତାର ବିଷୟ ପାଲଟିଛି ।
ନିକଟରେ ଦିଲ୍ଲୀ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (DDMA)ର ବୈଠକ ବସିଥିଲା । ଯେଉଁଥିରେ ସ୍ବାସ୍ଥ୍ୟ ବିଶେଷଜ୍ଞ କହିଥିଲେ, ଫ୍ଲୁ ଏବଂ କୋଭିଡ-୧୯ର ଲକ୍ଷଣଗୁଡିକ ସମାନ ଏବଂ ଦିଲ୍ଲୀ ସରକାର ବର୍ତ୍ତମାନର ଫ୍ଲୁ ସିଜନରେ କୋରୋନା ଭାଇରସ ସଂକ୍ରମଣ ରୋକିବା ଦିଗରେ ପରୀକ୍ଷଣ ଜାରି ରଖିବା ଜରୁରୀ ।
ସର୍ଭେରେ ଏହାମଧ୍ୟ କୁହାଯାଇଛି ଯେ, ବର୍ତ୍ତମାନ ଦିଲ୍ଲୀର ହସ୍ପିଟାଲଗୁଡିକରେ ଦୈନିକ ଅତିକମରେ ୫୦ ରୁ ୬୦ ଭାଇରାଲ ସଂକ୍ରମଣ ମାମଲା ସାମ୍ନାକୁ ଆସୁଛି । ସହରରେ ଅତ୍ୟଧିକ ଗ୍ରୀଷ୍ମପ୍ରବାହ ଏବଂ ପୁଣି ବର୍ଷା ଭଳି ପରିବର୍ତ୍ତିତ ପାଣିପାଗ ଯୋଗୁଁ ଫ୍ଲୁ ମାମଲା ବଢୁଥିବା କୁହାଯାଉଛି ।
@PTI
