ଥିରୁଅନନ୍ତପୁରମ: କେରଳର କୋଲାମ ଅଞ୍ଚଳରେ ଏକ ଆଶ୍ଚର୍ଯ୍ୟକର ଘଟଣା ଘଟିଛି । ଶୁକ୍ରବାର ଏକ ୨ ବର୍ଷର ଶିଶୁ ଘରୁ ନିଖୋଜ ହେବା ପରେ ରବର୍ ଇଷ୍ଟେଟ (ରବର ଗଛର ଘଞ୍ଚ ଜଙ୍ଗଲ) ମଧ୍ୟରେ ଠାବ (2 year old boy found in rubber estate) ହୋଇଛି । ଶିଶୁଟି ଏହି ଘଞ୍ଚ ଜଙ୍ଗଲ ମଧ୍ୟରେ କିପରି ପହଞ୍ଚିଲା ଏ ନେଇ ତଦନ୍ତ କରୁଛି ପୋଲିସ । ୨୪ ଘଣ୍ଟା ପରେ ଶନିବାର ସକାଳେ ପୋଲିସ ଶିଶୁକୁ ଜଙ୍ଗଲରୁ ଉଦ୍ଧାର କରିବା ପରେ ପ୍ରାଥମିକ ଚିକିତ୍ସା ପାଇଁ ହସ୍ପିଟାଲକୁ ପଠାଇଛି ।
ଯେଉଁ ଦିନ ଶିଶୁଟି ନିଖୋଜ ହୋଇଥିଲା ସେହି ଦିନ ରାତିରେ ପ୍ରବଳ ବର୍ଷା ମଧ୍ୟ ହୋଇଥିଲା । ଏହି ବର୍ଷା ମଧ୍ୟରେ ଶିଶୁଟି କିପରି ସେଠାରେ କିପରି ରହିଥିଲା, ଏ ସମସ୍ତ ଦିଗର ତର୍ଜମା କରୁଛି ପୋଲିସ । ଥାଡିକ୍କଡ ଅଞ୍ଚଳର ଅନସାରି ଓ ଫାଥିମାଙ୍କ ୨ ବର୍ଷର ଶିଶୁ ହେଉଛି ଫରହାନ । ଶୁକ୍ରବାର ସେ ଘରୁ ନିଖୋଜ ହୋଇଯାଇଥିଲା । ଏହାପରେ ପରିବାର ପୋଲିସକୁ ଖବର ଦେଇଥିଲେ । ପୋଲିସ ଓ ଅଗ୍ନିଶମ ବାହିନୀ ବହୁ ଖୋଜାଖୋଜି କରିବା ପରେ ବର୍ଷା ହେବାରୁ ବିଳମ୍ବିତ ରାତିରେ ଫେରି ଆସଥିଲେ ।
ଶିଶୁଟି ରବର ଇଷ୍ଟେଟ ମଧ୍ୟରେ ଥାଇପାରେ ବୋଲି ସନ୍ଦେହ କରି ସ୍ଥାନୀୟ ଲୋକେ ପୋଲିସ ସହ ଉକ୍ତ ଜଙ୍ଗଲରେ ପହଞ୍ଚିଥିଲେ । ସେଠାରେ ହିଁ ସେମାନେ ଶିଶୁଟିକୁ ପାଇ ଆଶ୍ଚର୍ଯ୍ୟଚକିତ ହୋଇପଡ଼ିଥିଲେ । ଶିଶୁଟି କିପରି ଏଠାରେ ପହଞ୍ଚିଲା ସେ ନେଇ ସମସ୍ତେ ଚିନ୍ତାରେ । ଶିଶୁଟି ଉଦ୍ଧାର ସମୟରେ ମଧ୍ୟ ଭୟଭୀତ ନଥିଲା । କେହି ଦୁର୍ବୃତ୍ତ ଫରହାନକୁ ଅପହରଣ ପରେ ଚାରିଆଡ଼େ ପୋଲିସର ଛାପା ଯୋଗୁଁ ସେ ଭୟରେ ତାକୁ ଏଠାରେ ଛାଡ଼ିଯାଇଥିବା ସନ୍ଦେହ କରିଛି ପୋଲିସ ।
