କାଲି ପାକିସ୍ତାନକୁ ଭେଟିବ ଭାରତ; ରାଉରକେଲାରୁ ଟିମ୍‌ ଇଣ୍ଡିଆକୁ ଶୁଭେଚ୍ଛା ଜଣାଇଲେ ପ୍ରଶଂସକ - T20 World Cup 2024

ରାଉରକେଲା: ଆସନ୍ତାକାଲି ହେଉଛି ଟି୨୦ ବିଶ୍ବକପ୍‌ କ୍ରିକେଟର ମହାଲଢେଇ । ବିଶ୍ବର ବହୁ ପ୍ରତିକ୍ଷିତ ମ୍ୟାଚ୍‌ରେ ପାକିସ୍ତାନକୁ ଭେଟିବ ଭାରତ । ପ୍ରଥମ ଥର ପାଇଁ ଆମେରିକାରେ ବିଶ୍ବକପ୍‌ ଆୟୋଜନ ହେଉଥିବାବେଳେ ଏହି ହାଇଭୋଲଟେଜ୍‌ ମ୍ୟାଚ୍‌ ନ୍ୟୁୟର୍କରେ ନସାଉ କାଉଣ୍ଟି ଇଣ୍ଟରନେସନାଲ କ୍ରିକେଟ ଷ୍ଟାଡିୟମରେ ଖେଳାଯିବ । ପ୍ରାୟ ୩୪ ହଜାର ଦର୍ଶକଙ୍କ ମଧ୍ୟରେ ଖେଳାଯିବ ଏହି ବହୁ ପ୍ରତିକ୍ଷିତ ମ୍ୟାଚ୍‌ । ଦୁଇ ପାରମ୍ପାରିକ ପ୍ରତିଦ୍ବନ୍ଦ୍ବୀ ମଧ୍ୟରେ ମ୍ୟାଚ୍‌ ପାଇଁ ଖେଳାଳିମାନଙ୍କ ମଧ୍ୟରେ ଯେତିକି ଉତ୍ସାହ, ଦର୍ଶକଙ୍କ ମନରେ ମଧ୍ୟ ଏହାଠାରୁ କେଇ ଗୁଣା ଅଧିକ ଉତ୍ସାହ ଭରିଛି । କୁନି କୁନି କ୍ରିକେଟ ପ୍ରେମୀଙ୍କଠାରୁ ଆରମ୍ଭ କରି ଯୁବ ଏବଂ ବରିଷ୍ଠ, ସମସ୍ତେ ଏହି ମହା ମୁକାବିଲାକୁ ଚାହିଁ ବସିଛନ୍ତି । ପାକିସ୍ତାନ ପ୍ରଥମ ମ୍ୟାଚ୍‌ USA ଠାରୁ ପରାସ୍ତ ହୋଇଛି ସତ, କିନ୍ତୁ କୌଣସି ମୁହୂର୍ତ୍ତରେ କମବ୍ୟାକ୍‌ କରିପାରେ। ଅନ୍ୟପକ୍ଷରେ ଭାରତୀୟ ଦଳ ନିଜର ପ୍ରଥମ ମ୍ୟାଚ୍‌ରେ ଆୟରଲାଣ୍ଡକୁ ହରାଇ ମନୋବଳ ଦୃଢ଼ ରଖିଛି । ତେବେ ଆଗାମୀ କାଲିର ମ୍ୟାଚ୍‌ ବେଶ ରୋମାଞ୍ଚକର ହେବ । ଏହି ପରିପ୍ରେକ୍ଷୀରେ ରାଉରକେଲାରୁ ନ୍ୟୁୟର୍କରେ ଥିବା ଭାରତୀୟ ଦଳକୁ ଶୁଭେଚ୍ଛା ଜଣାଇଛନ୍ତି ପ୍ରଶଂସକ ।

ଇଟିଭି ଭାରତ, ରାଉରକେଲା