ଅଲିମ୍ପିକ୍ସ ବିଜେତା ମନୁ ଓ ସରବଜୋତଙ୍କୁ ବାଲୁକାକଳାରେ ଶୁଭେଛା - Paris Olympics 2024

ପୁରୀ: ପ୍ୟାରିସ ଅଲିମ୍ପିକ୍ସ-2024ରେ ଭାରତ ଦ୍ବିତୀୟ ପଦକ ଜିତିଛି । 10 ମିଟର ଏୟାର ପିସ୍ତଲ ଯୁଗଳ ବର୍ଗ ଇଭେଣ୍ଟରେ ଭାରତର ଷ୍ଟାର ସୁଟର ମନୁ ଭାକର ଏବଂ ସରବଜୋତ ସିଂହ ବ୍ରୋଞ୍ଜ ପଦକ ଜିତିଛନ୍ତି । ଏହି ମ୍ୟାଚ୍‌ରେ ଉଭୟ ଭାରତୀୟ ଆଥଲେଟ ମନୁ ଓ ସରବଜୋତ ଚମତ୍କାର ପ୍ରଦର୍ଶନ କରିଥିଲେ । ଭାରତୀୟ ଯୋଡି ଫାଇନାଲରେ କୋରିଆ ଯୋଡ଼ିକୁ 16-10 ବ୍ୟବଧାନରେ ପରାସ୍ତ କରିଛ ନ୍ତି । ତେବେ ଏହି ଅବସରରେ ଦେଶବ୍ୟାପୀ ଖୁସିର ଲହରୀ ଖେଳିଯାଇଛି । ପ୍ରଖ୍ୟାତ ବାଲୁକାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ପୁରୀ ବେଳାଭୂମିରେ ବାଲୁକାକଳାରେ ଉଭୟଙ୍କୁ ଶୁଭେଛା ଦେଇଛନ୍ତି । ଏଥିରେ ଉଭୟ ମନୁ ଓ ସରବଜୋତଙ୍କ ପ୍ରତିକୃତି ସହ ଅଲିମ୍ପିକ୍ସ ମେଡାଲ ଓ ଲୋଗୋ ସ୍ଥାନ ପାଇଛି । ଏହି ବିଶାଳ ବାଲୁକାକଳାକୁ ଦେଖିବା ପାଇଁ ପୁରୀ ବେଳାଭୂମିରେ ପର୍ଯ୍ୟଟକଙ୍କ ବେଶ୍ ଭିଡ଼ ମଧ୍ୟ ଦେଖିବାକୁ ମିଳିଥିଲା ।

ଇଟିଭି ଭାରତ, ପୁରୀ